ევროპის საბჭოს მინისტრთა კომიტეტმა საქმეზე − „კლაუს და იური კილაძეები საქართველოს წინააღმდეგ“ (რეპრესირებულთა საქმე) − საბოლოო რეზოლუცია მიიღო, რითაც აღსრულების ეს საქმე საბოლოოდ დაიხურა. რეზოლუციით მინისტრთა კომიტეტმა დაადასტურა, რომ აღნიშნულ საქმეში დადგენილი დარღვევები საბოლოოდ აღმოიფხვრა მოპასუხე სახელმწიფოს მიერ გატარებული ეფექტური ინდივიდუალური და ზოგადი ღონისძიებების შედეგად.
ევროპული სასამართლოს მიერ აღნიშნულ საქმეზე 2010 წლის 2 თებერვალს გამოტანილი გადაწყვეტილების შემდეგ აღსრულების პროცესი მიმდინარეობდა. გადაწყვეტილებით დადგინდა, რომ დაირღვა ადამიანის უფლებათა და ძირითად თავისუფლებათა დაცვის ევროპული კონვენციის პირველი დამატებითი ოქმის პირველი მუხლი. აღნიშნული დარღვევა განაპირობა „საქართველოს მოქალაქეების პოლიტიკური რეპრესიების მსხვერპლად აღიარებისა და რეპრესირებულთა სოციალური დაცვის შესახებ“ კანონში არსებულმა ხარვეზმა. პოლიტიკური რეპრესიების მსხვერპლად აღიარებული პირები, ფაქტობრივად, ვერ სარგებლობდნენ კანონით განსაზღვრული მორალური კომპენსაციის მიღების უფლებით. შესაბამისად, ევროპულმა სასამართლომ მიიჩნია, რომ არსებული პრობლემის აღმოფხვრის მიზნით ეროვნულ დონეზე უნდა გატარებულიყო აუცილებელი საკანონმდებლო, ადმინისტრაციული და საბიუჯეტო ღონისძიებები.
ევროპული სასამართლოს გადაწყვეტილების აღსრულების მიზნით 2011 წლის 18 მაისს ძალაში შევიდა საკანონმდებლო ცვლილებები „საქართველოს მოქალაქეთა პოლიტიკური რეპრესიების მსხვერპლად აღიარებისა და რეპრესირებულთა სოციალური დაცვის შესახებ“ 1997 წლის საქართველოს კანონსა და „საქართველოს ადმინისტრაციულ საპროცესო კოდექსში“. აღნიშნული ცვლილებების თანახმად, ფულადი კომპენსაციის ოდენობას განსაზღვრავდა თბილისის საქალაქო სასამართლო. თბილისის საქალაქო სასამართლოს მიერ დადგენილი მორალური კომპენსაციის ოდენობა მერყეობდა 200-დან 500 ლარამდე, რაც ცალსახად არაადეკვატური იყო და ვერ უზრუნველყოფდა ევროპული სასამართლოს გადაწყვეტილების სრულფასოვან აღსრულებას.
შესაბამისად, წინა ხელისუფლების დროს მიღებული ზომები ევროსაბჭოს მინისტრთა კომიტეტის მიერ არ ჩაითვალა საკმარისად და სააღსრულებო პროცედურა გაგრძელდა.
2014 წელს იუსტიციის სამინისტროს მიერ შემუშავდა საკანონმდებლო ცვლილებათა პაკეტი, რომელიც ძალაში შევიდა 2015 წლის პირველი იანვრიდან. ხსენებული ცვლილებების მიზანია მორალური კომპენსაციის შესაძლო ოდენობის კანონის ძალით დადგენა, მინიმალური ზღვრის 5-ჯერ, ხოლოდ მაქიმალური ზღვრის 4-ჯერ გაზრდა წინანდელთან შედარებით. გარდა ამისა, ცვლილებები მიზნად ისახავს სასამართლო განსჯადობის გაფართოებას სასამართლო ხელმისაწვდომობის პრობლემის აღმოფხვრის მიზნით (ამჯერად ქუთაისის საქალაქო სასამართლოც უფლებამოსილია, განიხილოს რეპრესირებულთა საჩივრები).
იუსტიციის სამინისტრომ ევროპული სასამართლოს მიერ დადგენილი დარღვევების აღმოფხვრის მიზნით გატარებული ღონისძიებების სამოქმედო ანგარიში ევროპის საბჭოს მინისტრთა კომიტეტს 2014 წლის 5 დეკემბერს წარუდგინა; საბჭომ კი საბოლოო რეზოლუცია 11-12 მარტს გამართულ სხდომაზე მიიღო, რითაც დაადასტურა, რომ ევროპული სასამართლოს მიერ აღნიშნულ საქმეში დადგენილი დარღვევები საბოლოოდ აღმოიფხვრა მოპასუხე სახელმწიფოს მიერ გატარებული ეფექტური ღონისძიებების შედეგად.
