პარლამენტის თავმჯდომარემ დავით უსუფაშვილმა პარლამენტის რიგგარეშე სხდომასთან დაკავშირებით სპეციალურ პრესკონფერენციაზე განმარტებები გააკეთა და აღნიშნა, რომ რიგგარეშე სხდომას აქვს თავისი პოლიტიკურ-სამართლებრივი დატვირთვა.
,,პარლამენტის რიგგარეშე სხდომას აქვს თავისი პოლიტიკურ-სამართლებრივი დატვირთვა და დაუშვებელია მისი გადაქცევა სხდომის მოწვევის შესაძლო ინიციატორთა მიერ (პარლამენტის წევრთა ¼, პარლამენტის თავმჯდომარე, მთავრობა) პარლამენტის მართვის მექანიზმად. კერძოდ, თუ მივიჩნევთ, რომ პარლამეტის უმრავლესობა ვალდებულია აღნიშნულ სუბიექტთა მიერ ერთპიროვნულად განსაზღვრული დღის წესრიგით (რომელშიც ნებისმიერი სახის და რაოდენობის საკითხი შეიძლება იყოს შეტანილი) იმუშაოს რიგგარეშე სხდომების რეჟიმში (რომელიც ნებისმიერი სიხშირით შეიძლება იქნეს მოწვეული), მაშინ გამოვა, რომ საკანონმდებლო ორგანოს დღის წესრიგს და სამუშაო რეჟიმს განსაზღვრავს არა პარლამენტი თავისი წევრების უმრავლესობის გადაწყვეტილებით, არამედ საპარლამენტო უმცირესობა, პარლამენტის თავმჯდომარე და მთავრობა”, _აღნიშნა უსუფასვილმა.
მისივე განმარტებით, რიგგარეშე სხომა იმით განსხვავდება ჩვეულებრივი პლენარული სესიისგან რომ მის დღის წესრიგში ცვლილების შეტანა შეუძლებელია.
,,პარლამენტის სხდომის ჩატარება რიგგარეშე რეჟიმში მხოლოდ იმით განსხვავდება ჩვეულებრივი სხდომისგან, რომ მის დღის წესრიგში ცვლილების შეტანა შეუძლებელია. პარლამენტის მუშაობის და საკითხების განხილვის მომწესრიგებელი ვერც ერთი სხვა ნორმა და პროცედურა, რაც დადგენილია პარალამენტის მორიგი სხდომისთვის, ვერ შეიცვლება რიგგარეშე სხდომის დროს. მაგალითად, ვერ მოხდება კანონის ან დადგენილების პროექტის განხილვა და მიღება მისი დადგენილი წესით ინიცირების ან საკომიტეტო განხილვების გარეშე, ვერ მოხდება პოლიტიკური დებატების გამართვა რაიმე განსხვავებული რეჟიმით და ასე შემდეგ”, _აღნიშნა უსუფაშვილმა.
