საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე დეპუტატებმა სსიპ იურიდიული დახმარების სამსახურის მიერ 2014 წელს განხორციელებული საქმიანობის შესახებ ანგარიში უნდა შეაფასონ.
კომიტეტის სხდომაა 12:00 საათზეა ჩანიშნული.
სამსახურის უფროსმა მელიტონ ბენიძემ დეპუტატებს იურიდიული სამსახურის ცალკე უწყებად ჩამოყალიბების შემდეგ გატარებულ ღონისძიებებზე დეტალური ინფორმაცია 9 მარტს, კომიტეტის სხდომაზე წარუდგინა. ამავე სხდომაზე 2014 წლის განმავლობაში გაწეული საქმიანობის გარდა, წინა წლებში სამსახურის მიერ განხორციელებულ აქტივობებზეც გამახვილდა ყურადღება.
იგეგმება განხილვა საქართველოს დამოუკიდებლობისა და ტერიტორიული მთლიანობისათვის დაღუპულ მებრძოლთა ოჯახების უფლებებისა და სოციალური დახმარების კავშირის ,,იმედის“ მიერ წარმოდგენილი საკანონმდებლო წინადადებაზეც. ეს წინადადება ,,სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონში ცვლილების შეტანის მოთხოვნას ითვალისწინებს და ინიციატორებმა იგი 9 მარტის სხდომაზე წარმოადგინეს.
დღევანდელ სხდომაზე ადამიანის უფლებათა დაცვისა და სამოქალაქო ინტეგრაციის კომიტეტის მიერ მომზადებული „საქართველოს ადმინისტრაციულ საპროცესო კოდექსში ცვლილების შეტანის შესახებ“ საქართველოს კანონის პროექტის ინიცირების საკითხიზეც იმსჯელებენ. კანონპროექტით გათვალისწინებული ცვლილებები სახალხო დამცველის საკანონმდებლო წინადადების საფუძველზე მომზადდა. ადამიანის უფლებათა დაცვისა და სამოქალაქო ინტეგრაციის კომიტეტში მიიჩნევენ, რომ სახალხო დამცველს საშუალება უნდა ჰქონდეს გამოიყენოს სასამართლო მეგობრის ინსტიტუტი არა მხოლოდ სისხლის სამართლისა და საკონსტიტუციო სამართლის საქმეებზე,არამედ ადმინისტრაციულ სამართალწარმოებას მიკუთვნებულ საკითხებთან დაკავშირებითაც.ზოგადად, ,,სასამართლოს მეგობარს” - პირს ან პირთა ჯგუფს, რომელთა ინტერესის სფეროში შედის სასამართლოში განსახილველი საკითხი, მაგრამ ის არ არის რომელიმე მხარე, შეუძლია სასამართლოსთვის თავისი არგუმენტების წარდგენა და პროცესში უშუალოდ ჩართვა. სასამართლოს მეგობარი შეიძლება იყოს ნებისმიერი კერძო პირი, სხვადასხვა დარგის სპეციალისტი, მეცნიერი, არასამთავრობო ორგანიზაციის წარმომადგენელი, სტუდენტი, სახელმწიფო უწყების წარმომადგენელი და ა.შ. სასამართლოს მეგობარი, როგორც წესი, არის კვალიფიციური პირი, რომლის მოსაზრებებმაც, შეიძლება, სასამართლოს გაუწიოს დახმარება.
