მასობრივი არეულობები კიევში. ეროვნულ ბანკთან გამართული აქცია მილიციამ ძალის გამოყენებით დაშალა. სამართალდამცავებმა შენობის წინ აგებული ბარიკადები და კარვები ბულდოზერებით დაანგრიეს. რადიკალური პარტიის ლიდერის, ოლეგ ლიაშკოს მტკიცებით, მიტინგის დარბევის შედეგად რამდენიმე მანიფესტანტი დაშავდა. მომხდართან დაკავშირებით მოგვიანებით კომენტარი უკრაინის შინაგან საქმეთა მინისტრმა გააკეთა. არსენ ავაკოვის მტკიცებით, აქციის დარბევის გადაწყვეტილება მისი თანხმობის გარეშე იქნა მიღებული, რის გამოც მილიციის რაიონული განყოფილების უფრსი თანამდებობიდან გათავისუფლდა, მომხდართან დაკავშირებით კი სისხლის სამართლის საქმე აღიძრა. აქციის მონაწილეები ეროვნული ბანკის პრეზიდენტის გადადგომას ითხოვდნენ.