ხვალ, 7 იანვარს, საშობაო ალილოს მსვლელობასთან დაკავშირებით, თბილისში გადაიკეტება შემდეგი ქუჩები: ვარდების მოედანი - დღის 12:00 საათიდან, ხოლო რუსთაველის გამზირი, პუშკინის ქუჩა, ბარათაშვილის აღმართი, ავლაბრის მოედანი, მესხიშვილის, გონაშვილის და სამრეკლოს ქუჩები - 14:00 საათიდან.
შსს ინფორმაციით, აღნიშნულ ქუჩებზე ავტომანქანების მოძრაობა ალილოს დასრულებისთანავე განახლდება.
შეგახსენებთ, რომ ხვალ, 7 იანვარს ალილოს მსვლელობა გაიმართება, რომელიც ვარდების მოედნიდან 14:00 საათზე დაიწყება.
ალილოს ტრადიციულად თეატრალიზებული სახე ექნება.
ალილოს მონაწილეები რუსთაველის გამზირს, თავისუფლების მოედანსა და პუშკინის ქუჩას გავლიან. კონკასთან მონაწილეთა ერთი ჯგუფი საპატრიარქოში გადავა, სადაც მათ სრულიად საქართველოს კათოლიკოს-პატრიარქი შეხვდება და ალილოსთვის ტკბილეულს გადასცემს.
შემდეგ მსვლელობა ბარათაშვილის ხიდით ბარათაშვილის ქუჩაზე გაგრძელდება, და შობის მახარობლების ნაწილი პრეზიდენტის სასახლისკენ გადაინაცვლებს, სადაც მათ ტკბილეულს პრეზიდენტი გადასცემს.
ალილოს მსვლელობა ტრადიცილად ყოვლადწმინდა სამების ტაძარში დასრულდება, სადაც სასულიერო პირები პარაკლისს გადაიხდიან.
ალილოში მონაწილეებს გზადაგზა მოსახლეობა ტკბილეულსა და საჩუქრებს გადასცემს.
ყოვლადწმინდა სამებაში მიტანილი შემოწირულობები 8-9 იანვარს დახარისხდება და 10 იანვარს ბავშვთა სახლებსა და უმწეოთა თავშესაფრებში გადანაწილდება.