ლიტვის ქალაქ კაუნასის მაღაზიებში პროდუქტებს სტიკერი წარწერით: ,,არ იყიდო კრემლის პროპაგანდა" დააკრეს. ინიციატივა სოციალურ ქსელ ,,ფეისბუკში" ამავე სახელწოდებით დარეგისტრირებული ჯგუფის წევრებს ეკუთვნით, რომლებიც აცხადებენ, რომ იმ პროდუქციის ყიდვით, რომელსაც რუსეთის საინფორმაციო საშუალებები უწევენ რეკლამას, თანხა სწორედ რუსულ ტელეარხებს მისდით.
,,ჩვენი ჯგუფი 3 იანვრიდან შეუდგა მუშაობას. პროდუქტებს, რომლებსაც რუსული ტელეარხები უწევენ რეკლამას ,,კოლორადოს სტიკერებს" ვაკრავთ, რათა ხალხს დავანახოთ, რომ ამ პროდუქციას კრემლის პროპაგანდისტული მანქანა უჭერს მხარს.
იმედი გვაქვს, მეწარმეები მიხვდებიან, რომ ლიტველებთან რუსული პროპაგანდა არ გაჭრის და თავიანთი ნაწარმისთვის რუსულ არხებს რეკლამას არ შეუკვეთავენ." - წერენ ჯგუფის წევრები სოციალურ ქსელში.
აკრძალვა ქართულ ბორჯომსაც ,,დაატყდა," სტიკერი: ,,არ იყიდო კრემლის პროპაგანდა," კაუნასის მაღაზიების ვიტრინებზე ჩამწკრივებულ და რუსული ტელეარხების მიერ რეკლამირებული მინერალური წყლის ბოთლებსაც მიაკრეს.
