პრეზიდენტი გიორგი მარგველაშვილი თავდაცვის უწყების მიერ გაკეთებულ განცხადებას გამოეხმაურა და განმარტა, რომ უსიამოვნო შთაბეჭდილებას ტოვებს, როდესაც მთელი პოლიტიკური სპექტრი და ქვეყანა ერთიანდება ერთი ადამიანის წინააღმდეგ.
,,არ ვფიქრობ, რომ მე უნდა გავაკეთო განცხადებებზე რეაგირების კომენტირება, მაგრამ შემიძლია გითხრათ, ძალიან უსიამოვნო შთაბეჭდილებას ტოვებს, როდესაც მთელი პოლიტიკური სპექტრი და ქვეყანა ერთიანდება ერთი ადამიანის წინააღმდეგ. მე ვფიქრობ, უნდა მივცეთ შესაძლებლობა ადამიანებს, თავიანთი პოზიცია გამოხატონ, ცოტა უფრო მშვიდი რეაგირება უნდა გვქონდეს ასეთ თემებზე", - განაცხადა მარგველაშვილმა.
შეგახსენებთ, რომ ქართველი მებრძოლი ალექსანდრე გრიგოლაშვილი ლუგანსკის ოლქის ქალაქ სჩასტიესთან დაიღუპა. ცნობილია, რომ უკრაინელ მებრძოლთა ჯგუფი ჩასაფრებაში მოჰყვა, რის შედეგადაც ორი მებრძოლი დაიღუპა. გრიგოლაშვილი უკრაინაში რამდენიმე თვე იმყოფებოდა, იგი აიდარის სადაზვერვო ქვედანაყოფს მეთაურობდა.
თავდაცვის სამინისტრომ კი გამოაქვეყნა განცხადება, რომელშიც აღნიშნულია, "რომ ალექსანდრე გრიგოლაშვილის დაღუპვის გამო, სრული პასუხისმგებლობა ეკისრებათ ყოფილი ხელისუფლების წარმომადგენლებს, რომლებიც საქართველოს მოქალაქეებს მოუწოდებენ, მონაწილეობა მიიღონ ჩვენი ქვეყნის ფარგლებს გარეთ მიმდინარე საბრძოლო მოქმედებებში. თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას". მოგვიანებით კი თავდაცვის სამინისტრომ აღიარა რომ ალექსანდრე გრიგოლაშვილთან დაკავშვრებით გაკეთებული განცხადება იყო შეცდომა.
,,ეს იყო შეცდომა, თუმცა აქვე ვაცხადებ რომ შეცდომისგან დაზღვეული არავინ არ არის. ეს იყო შეცდომა და მნიშვნელოვანია, რომ ჩვენ ამ შეცდომას ვხედავთ და ვაღიარებთ, თავდაცვის სამინისტროს ხელმძღვანელობა. ეს იყო შეცდომა გარკვეულ ემოციურ ფონზე. თავდაცვის მინისტრი ამ განცხადებას გამოქვეყნებამდე არ გაცნობია", - განაცხადა თავდაცვის მინისტრის მოადგილემ ლევან ღირსიაშვილმა და აღნიშნა, რომ უნდა გაკეთებული ყო სამძიმრის განცხადება და ის, რაც გამოქვეყნდა სამინისტროს ხელმძღვანელობასთან შეთანხმებული არ ყოფილა.მინისტრის მოადგილემ არ დაასახელა კონკრეტული პირი, თუ ვინ შეადგინა ეს განცხადება.
საზოგადოების ნაწილი, არასამთავრობო სექტორი, პოლიტიკოსების ნაწილი, თავდაცვის უწყების ხელმძღვანელის გადადგომას ითხოვს.