თურქმენეთის პრეზიდენტის სასახლეში საქართველოს პრეზიდენტის დახვედრის ოფიციალური ცერემონია გაიმართა, რომელსაც ოფიციალური პირების გარდა თურქმენეთში აკრედიტებული დიპლომატიური კორპუსის წარმომადგენლები ესწრებოდნენ. „ოგუზხანის" საპრეზიდენტო სასახლის დარბაზში სახელმწიფოთა ჰიმნების შესრულების შემდეგ, ორი ქვეყნის პირველმა პირებმა ერთმანეთს დელეგაციები წარუდინეს.
დახვედრის ოფიციალური ცერემონიის დასრულებისთანავე საქართველოსა და თურქმენეთის ლიდერები ერთმანეთს ჯერ პირისპირ, ხოლო შემდეგ გაფართოებული შემადგენლობით შეხვდნენ. მხარეებმა ორმხრივი თანამშრომლობის საკითხები განიხილეს და როგორც ორმხრივი, ისე მრავალმხრივი ურთიერთობის გაღრმავების აუცილებლობაზე იმსჯელეს. გიორგი მარგველაშვილმა თურქმენ კოლეგასთან საუბრისას აღნიშნა, რომ საქართველო თურქმენეთს მნიშვნელოვან და საიმედო პარტნიორად განიხილავს ცენტრალური აზიის რეგიონში. საქართველოს პრეზიდენტის თქმით, მნიშვნელოვანია, რომ თანამშრომლობა ყველა სფეროს მიმართულებით უნდა განვითარდეს, რისთვისაც მნიშვნელოვანია სახელმწიფოთაშორისი მუდმივი დილოგის შენარჩუნება ყველა დონეზე. როგორც პრეზიდენტების, ისე დელეგაციების შეხვედრისას გამოითქვა სურვილი თანამშრომლობა გაღრმავდეს ეკონომიკის, კერძოდ კი ვაჭრობის, ტურიზმის, ტრანსპორტის სფეროებში. ორ ქვეყანას შორის ურთიერთობის განმტკიცების სურვილის დასტურია საქართველოში თურქმენეთის საელჩო გახსნა.
გიორგი მარგველაშვილმა მადლობა გადაუხადა თურქმენეთის პრეზიდენტს საქართველოს სუვერენიტეტისა და ტერიტორიული მთლიანობის, ასევე ოკუპირებული ტერიტორიების დამოუკიდებლობის არაღიარების პოლიტიკის ურყევი მხარდაჭერისათვის. ქართულმა მხარემ აღნიშნა, რომ მოსკოვსა და სოხუმის საოკუპაციო რეჟიმს შორის „მოკავშირეობისა და სტრატეგიული პარტნიორობის შესახებ" ე.წ. ხელშეკრულების ხელმოწერის შემდეგ, იგეგმება ანალოგიური შეთანხმების გაფორმება ცხინვალის საოკუპაციო რეჟიმთანაც, რომელიც ინტეგრაციის კიდევ უფრო მაღალ ხარისხს ითვალისწინებს. ქართული მხარის განცხადებით, ეს კიდევ ერთხელ ადასტურებს რუსეთის ფედერაციის განზრახვას ანექსიის პოლიტიკის გაგრძელებასთან დაკავშირებით და მიზნად ისახავს მნიშვნელოვანი დაბრკოლება შეუქმნას საქართველოს მზარდ ევროპულ და ევროატლანტიკურ მისწრაფებას.
გიორგი მარგველაშვილმა თურქმენეთის პრეზიდენტს ქვეყნის ერთ-ერთი ყველაზე მნიშვნელოვანი ეროვნული დღესასწაული - ნეიტრალიტეტის დღე მიულოცა, რომელიც თურქმენმა ხალხმა საქართველოს პრეზიდენტის ვიზიტამდე რამდენიმე დღით ადრე - 12 დეკემბერს აღნიშნა.
საქართველოს პრეზიდენტმა თურქმენი კოლეგა საპასუხო ვიზიტით საქართველოში მოიწვია. გურბანგული ბერდიმუჰამედოვმა მოწვევა მიიღო და განაცხადა, რომ აუცილებლად ესტუმრება საქართველოს. შეხვედრისას, მხარეებმა ხაზგასმით აღნიშნეს უმაღლესი რანგის ვიზიტები, შეხვედრები და მოლაპარაკებები ხელს შეუწყობს საქართველოსა და თურქმენეთს შორის ორმხრივი თანამშრომლობის განვითარებას. მხარეებმა იმედი გამოთქვეს, რომ ეს ვიზიტი ახალი იმპულსი იქნება ორ ქვეყანას შორის წარმატებული თანამშრომლობის განვითარებისათვის.
შეხვედრისას განხილულ თემებს პრეზიდენტები ერთობლივ პრესკონფერენციაზე შეაჯამებენ.
შეხვედრას ქართული მხრიდან საქართველოს ეკონომიკის მინისტრი გიორგი კვირიკაშვილი, საგარეო საქმეთა მინისტრის მოადგილე დავით ჯალაღანია, საგარეო საქმეთა სამინისტროს დსთ-ს ქვეყნებთან ურთიერთობის დეპარტამენტის უფროსი მერაბ ვაშაკიძე, საქართველოს სავაჭრო-სამრეწველო პალატის პრეზიდენტი კახა ბაინდურაშვილი, ეროვნული უშიშროების საბჭოს მდივანი ირინე იმერლიშვილი, პრეზიდენტის ადმინისტრაციის უფროსი დავით პატარაია და საქართველოს პრეზიდენტის მრჩევლები თენგიზ ფხალაძე და გიორგი აბაშიშვილი ესწრებოდნენ.
