დღეს, 10 დეკემბერს 12:00 საათზე, საქართველოს სავაჭრო-სამრეწველო პალატაში - GS1 საქართველო, საქართველოს სავაჭრო-სამრეწველო პალატასთან ერთად მართავს შეხვედრას "გლობალური სტანდარტების როლი ჯანდაცვაში".
შეხვედრას დაესწრებიან საქართველოს შრომის, ჯანმრთელობის და სოციალური დაცვის მინისტრის მოადგილე ვალერი კვარაცხელია, ჯანდაცვის სფეროს წარმომადგენლები: მარეგულირებელი ორგანოები; საავადმყოფოს მმართველი გუნდი; სამედიცინო პრეპარატების მწარმოებლები; ფარმაცევტული კომპანიები.
საქართველოს სავაჭრო-სამრეწველო პალატის ინფორმაციით, შეხვედრას წარუძღვებიან მოწვეული სპიკერები: Tania Snioch , ჯანდაცვის დირექტორი, GS1-ის სათაო ოფისი, ბრუსელი; Feargal Mc Groarty, ეროვნული ჰემოფილიის სისტემა, პროექტის ხელმძღვანელი, St James ჰოსპიტალი, დუბლინი.
შეხვედრაზე განხილული იქნება საერთაშორისო სტანდარტების გამოყენების უპირატესობა ჯანდაცვის სისტემაში, როგორც პაციენტთა უსაფრთხოების ასევე ხარჯების შემცირების კუთხით; მსოფლიოში არსებული ძირითადი მარეგულირებელი მოთხოვნები (FDA დებულება ხელსაწყოს უნიკალური იდენტიფიკაციის UDI (Unique Device Identification) შესახებ და ევროკომისიის ფალსიფიცირებული მედიკამენტების დირექტივა); GS1-ის სისტემის დანერგვის მოდელი St James ჰოსპიტალის მაგალითზე.