1993 წლის 22 სექტემბერს, ბაბუშერას აეროპორტში თვითმფრინავის აფეთქებისას დაღუპული ოთხი ქართველი მებრძოლის: ვასიკო და ნუკრი წიკლაურების, თემურ და ზურაბ ზალდასტანიშვილების სამების საკათედრო ტაძარში გამართულ სამოქალაქო პანაშვიდს ფინანსთა მინისტრი ნოდარ ხადური დაესწრო. მან ოჯახის წევრებსა და ახლობლებს მიუსამძიმრა.
„მნიშვნელოვანია ის, რომ ჩვენი დაღუპული ბიჭების იდენტიფიცირება მოხდა. იცით, რომ ეს პროცესი გრძელდება - სხვა მებრძოლების ცხედრების ექსპერტიზა მიმდინარეობს და ამასთან, მოლაპარაკებებიც იმ პერიოდში დაღუპულთა გადმოსვენებასთან დაკავშირებით. ჩვენმა გმირებმა სამშობლოს ყველაზე ძვირფასი - სიცოცხლე შესწირეს, მათ ხსოვნას მუდმივად მივაგებთ პატივს", - აღნიშნა ფინანსთა მინისტრმა.
