პარლამენტის ევროპასთან ინტეგრაციის და საგარეო ურთიერთობათა კომიტეტების გაერთიანებული სხდომა გაიმართა, რომელზეც მოწვეული იყო საქართველოში ევროკავშირის წარმომადგენლობის ხელმძღვანელი, ელჩი იანოშ ჰერმანი.
სხდომას ასევე დაესწრნენ კომიტეტების, ფრაქციების თავმჯდომარეები და წევრები.
ევროპასთან ინტეგრაციის კომიტეტის თავმჯდომარემ, ვიქტორ დოლიძემ მადლობა გადაუხადა საქართველოში ევროკავშირის წარმომადგენლობის ხელმძღვანელს მობრძანებისათვის და აღნიშნა, რომ საქართველოს ევროპული და ევროატლანტიკური კურსი უცვლელია და მას ალტერნატივა არ გააჩნია.
„საქართველომ ძალიან ბევრი იმუშავა და კიდევ ბევრი აქვს სამუშაო დემოკრატიული ინსტიტუტების განვითარებისათვის, რათა დავუმტკიცოთ ჩვენ ევროპელ პარტნიორებს, რომ ჩვენ სწორ გზაზე ვდგავართ" -განაცხადა კომიტეტის თავმჯდომარემ.
მან ასევე იმედი გამოთქვა, რომ 2015 წლის აღმოსავლეთ პარტნიორობის რიგის სამიტი იქნება ქვაკუთხედი საქართველოს დაახლოების ევროკავშირთან. კომიტეტის თავმჯდომარემ იმედი გამოთქვა, რომ მოხდება ასოცირების შეთანხმების რატიფიკაციის დაჩქარება და დაფიქსირდება პროგრესი საქართველოს მოქალაქეების ევროკავშირის ქვეყნებში უვიზოდ მიმოსვლის დაწყების მიმართულებით.
საქართველოში ევროკავშირის წარმომადგენლობის ახლადდანიშნულმა ელჩმა საქართველოსა და ევროკავშირს შორის ურთიერთობების მნიშვნელოვან ასპექტებზე და საქართველოს ევროკავშირთან ინტეგრაციის პერსპექტივებზე ისაუბრა.
ელჩის თქმით, ევროკავშირი აქტიურად უჭერს მხარს საქართველოს ასოცირების შესახებ შეთანხმების იმპლემენტაციისა და რატიფიკაციის, ასევე ვიზის ლიბერალიზაციის საკითხში, რაც მნიშვნელოვანი ეტაპია ევროპასთან ინტეგრაციის გზაზე. მან ასევე გამოხატა ჟენევის მოლაპარაკებების პროცესში ჩვენი ქვეყნისადმი მხარდაჭერა.
იანოშ ჰერმანმა ასევე ყურადღება გაამახვილა ევროკავშირის წინაშე მდგარ გამოწვევებზე და მათი გადაჭრის გზებზე. ელჩმა აღნიშნა, რომ ევროკავშირი ებრძვის ფინანსურ კრიზისს და მისი გადაჭრის გზებზე აქტიურად მუშაობს. მიუხედავად პრობლემებისა, ევროკავშირი აღმოსავლეთის პარტნიორობის წევრ ქვეყნებს მნიშვნელოვან ფინანსურ დახმარებას გაუწევს.
„ევროკავშირი საქართველოს სამი წლის განმავლობაში დახმარების სახით 100 მილიონ ევროს გამოუყოფს. ჩვენ ვეხმარებით საქართველოს სასამართლო რეფორმის განხორციელებაში, სოფლის მეურნეობის სფეროს განვითარებაში და ყველაფერს გავაკეთებთ იმისათვის, რომ მოქალაქეებმა იგრძნონ თუ რას გულისხმობს ევროპული არჩევანი" - განაცხადა ელჩმა.
სხდომაზე საგარეო ურთიერთობათა კომიტეტის თავმჯდომარემ, თედო ჯაფარიძემ სიტყვით გამოსვლისას აღნიშნა, რომ საქართველო აქტიურად მუშაობს ევროპასთან დაახლოებაზე და ევროკავშირის მიერ საქართველო-ევროკავშირის სავიზო რეჟიმის ლიბერალიზაციის სამოქმედო გეგმის პირველი ფაზის წარმატებით შესრულების აღიარება, მეორე ფაზაზე გადასვლა და საქართველოს პროგრესის დაფიქსირება ძალიან სასიხარულო ფაქტია.
გამოსვლების შემდეგ სხდომა კითხვა-პასუხის რეჟიმში გაგრძელდა. საქართველოს პარლამენტის დეპუტატებმა ევროკავშირის წარმომადგენლობის ხელმძღვანელს კითხვები დაუსვეს რუსეთის ფედერაციის პრეზიდენტსა და აფხაზეთის დე ფაქტო რეჟიმის მეთაურს შორის 2014 წ. 24 ნოემბერს ხელმოწერილ ე.წ. „მოკავშირეობისა და სტრატეგიული პარტნიორობის შესახებ" ხელშეკრულებაზე, ჟენევის მოლაპარაკებებზე და ევროკავშირის გეგემებზე საქართველოსთან მიმართებაში.
დასასრულს, ვიქტორ დოლიძემ და თედო ჯაფარიძემ იანოშ ჰერმანს წარმატებები უსურვეს სამომავლო საქმიანობაში.
პარლამენტის ინფორმაციით, მხარეები შეთანხმდნენ, რომ გააგრძელებენ აქტიურ თანამშრომლობას საქართველოს ევროინტეგრაციის დღის წესრიგის წარმატებით განხორციელების მიზნით.
