საქართველოს პრეზიდენტი ვარშავაში ვიზიტის ფარგლებში პოლონეთის საერთაშორისო ურთიერთობათა ინსტიტუტს ესტუმრა, სადაც დამსწრე საზოგადოების წინაშე სიტყვით წარსდგა. საჯარო გამოსვლის თემა იყო "საქართველო - ევროპის ხიდი აღმოსავლეთ და დასავლეთს შორის". გიორგი მარგველაშვილმა გამოსვლა საქართველოს ოკუპირებულ რეგიონებში შექმნილი ვითარებით დაიწყო. მისი განცხადებით, ცხინვალის რეგიონი აპირებს გაყვეს აფხაზეთის გზას და რუსეთთან ხელი მოაწეროს ე.წ. ხელშეკრულებას „მოკავშირეობისა და პარტნიორობის შესახებ". ქვეყნის პირველი პირი უკრაინაში განვითარებულ მოვლენებსაც შეეხო და აღნიშნა, რომ უკრაინაში იგივე სცენარი განმეორდა, რომელიც 2008 წლის აგვისტოში რუსეთმა საქართველოში განახორციელა.
სახელმწიფოს მეთაურმა პოლონეთს კიდევ ერთხელ გადაუხადა მადლობა საქართველოს ტერიტორიული მთლიანობისა და სუვერენისტეტის მხარდაჭერისთვის და აღნიშნა, რომ პოლონეთი საქართველოს ევროპულ და ევროატლანტიკურ სტრუქტურებში გაწევრების გზაზე ერთ-ერთი ყველაზე დიდი მხარდამჭერია. პრეზიდენტის განცხადებით, პოლონეთს აქვს ევროპასთან ინტეგრაციის ძალიან დიდი და საინტერესო გამოცდილება და საქართველო მის მაგალითს მიყვება. ქვეყნის პირველმა პირმა ხაზგასმით აღნიშნა, რომ საქართველოს, ნატო-სა და ევროკავშირის მისიებში მონაწილეობით, დიდი წვლილი შეაქვს გლობალური უსაფრთხოებისა და მშვიდობის დამყარების საქმეში და ქვეყანა არა მხოლოდ ამ პროცესის მონაწილე, არამედ, მისი მომხმარებელიც უნდა გახდეს.
გიორგი მარგველაშვილმა გამოსვლისას ყურადღება ეკონომიკურ საკითხებზეც გაამახვილა. მისი თქმით, საქართველო უნდა გახდეს ევროპული და აზიური ბაზრების დამაკავშირებელი რგოლი, ამას კი ასოცირების შეთანხმების ხელმოწერა, რომლის ფარგლებშიც გაფორმდა ღრმა და ყოვლისმომცველი თავისუფალი ვაჭრობის ხელშეკრულება, დიდად უწყობს ხელს.
საქართველოს პრეზიდენტმა ქვეყნის საგარეო კურსზეც ისაუბრა. როგორც მან აღნიშნა, ეს კურსი შეუქცევადია, რადგან ეს ქართველი ერის არჩევანით არის განსაზღვრული - ხალხმა მკაფიოდ გამოხატა საკუთარი გზა და მიზნები და ქვეყანა უნდა დაუბრუნდეს ევროპულ ოჯახს. მისი თქმით, საქართველომ საამისოდ გადადგა მნიშვნელოვანი ნაბიჯები კონკრეტული რეფორმების განხორციელებითა და რეგულაციების ამოქმედებით.
საქართველოს პრეზიდენტმა შეკრებილი საზოგადოების შეკითხვებსაც უპასუხა. დამსწრეთა ინტერესის სფეროს, ზემოთ ჩამოთვლილი თემების გარდა, საქართველო-რუსეთის ურთიერთობა და ქვეყნის შიდა პოლიტიკა წარმოადგენდა.
პოლონეთის საერთაშორისო ურთიერთობების ინსტიტუტში პრეზიდენტის სიტყვით გამოსვლას პოლონელი ექსპერტები, დიპლომატები, პოლიტიკოსები და სტუდენტები ესწრებოდნენ.
