,,ნაციონალური მოძრაობა" "ქართული ოცნების" დაპირებების შესასრულებლად საკანონმდებლო ინიციატივების ციკლს იწყებს. აღნიშნულთან დაკავშირებით, საპარლამენტო უმცირესობის დეპუტატებმა ზურაბ ჯაფარიძემ და გოგა ხაჩიძემ პრესკონფერენცია გამართეს და აღნიშნეს, რომ ორ საკანონმდებლო ინიციატივას პარლამენტში დღესვე დაარეგისტრირებენ.
"ჩვენ არ ვიცით არც ერთი ფორმალური მიზეზი, რატომ არ უნდა შესრულდეს ის დაპირებები, რომელიც გასცა "ქართულმა ოცნებამ" და ქვეყნის ამჟამინდელმა რეალურმა მმართველმა, ყოფილმა პრემიერმა ბიძინა ივანიშვილმა. არსებობს შესაბამისი რესურსი, არსებობს საჯაროდ გაცემული დაპირება და ერთადერთი რაც არ არსებობს - საკანონმდებლო მექანიზმი, რომელიც იმ დაპირებას რეალობად აქცევს. ჩვენ ვიწყებთ ციკლს იმ დაპირებების შესასრულებელი მექანიზმის შესაქმნელად და დღეს ორი მათგანი მინდა წარმოგიდგინოთ, რომლითაც დღეს შევალთ და დავარეგისტრირებთ პარლამენტში. ერთი ეხება სახელმწიფო პენსიის ზრდას დაპირებული 220 ლარამდე და მეორე ეხება ე.წ. უფასო ფულის თემას. ამ კანონპროექტების მიღების შემთხვევაში ორივე შეიძლება შესრულდეს",-განაცხადა გოგა ხაჩიძემ.
