პარლამენტის თავმჯდომარე დავით უსუფაშვილი თბილისის პარლამენტის სასახლეში საქართველო-თურქეთის საპარლამენტო მეგობრობის ჯგუფის წევრებს შეხვდა. როგორც ,,ჯი-ეიჩ-ენს" პარლამენტიდან აცნობეს უსუფასვილმა დიდი მადლობა გადაუხადა სტუმრებს ჩამობრძანებისთვის და აღნიშნა, რომ ქვეყნებს შორის არსებული მეგობრობისა და თანამშრომლობის კიდევ უფრო გარღმავებას ასეთი სახის ვიზიტები ხელს შეუწყობს. მხარეებმა ისაუბრეს რამდენიმე დღის წინ ბათუმში გამართულ საქართველოს, თურქეთის რესპუბლიკისა და აზერბაიჯანის რესპუბლიკის პარლამენტების საგარეო ურთიერთობათა კომიტეტების სამმხრივ შეხვედრაზე. აღინიშნა, რომ ორ ქვეყანას შორის ბევრ საკითხთან დაკავშირებით იგეგმება თანამშრომლობა და ამ მიმართულებით საპარლამენტო მეგობრობის ჯგუფებმა მაკოორდინირებელი როლი უნდა შეასრულონ.
თურქეთის საპარლამენტო დელეგაციის ხელმძღვანელმა, მუსტაფა შენთოფმა განაცხადა, რომ თურქეთისთვის საქართველო განსაკუთრებული მეზობელი და მეგობარია. ,,მინდა კიდევ ერთხელ დავაფიქსირო, რომ თურქეთი იყო, არის და მუდმივად იქნება საქართველოს მეგობარი ნებისმიერ ასპარეზზე. ჩვენ მივესალმებით საქართველოს სწრაფვას ევროპული და ევროატლანტიკური სტრუქტურებისაკენ და გარწმუნებთ, რომ ყოველთვის მხარს დაგიჭერთ საერთაშორისო და რეგიონულ დონეზე",-აღნიშნა თურქეთის საპარლამენტო დელეგაციის ხელმძღვანელმა.
შეხვედრის მონაწილეებმა ისაუბრეს ორ ქვეყანას შორის სავაჭრო და ეკონომიკური ურთიერთობების გაღრმავებაზე და პერსპექტივებზე.
თურქეთის საპარლამენტო დელეგაციის წევრებმა აღნიშნეს, რომ თურქეთის თანამშრომლობისა და კოორდინაციის სააგენტო ,,TİKA", რომლის მხარდაჭერითაც ბოლნისში შეზღუდული შესაძლებლობების მქონე ბავშვთა ცენტრი გაიხსნა, კიდევ ბევრ პროექტს განახორციელებს საქართველოში.
,, ჩვენ ძალიან ვამაყობთ თქვენთან მეგობრობით და თქვენი მხარდაჭერისა და თანადგომის იმედი გვაქვს ყველგან"-განაცხადა საქართველოს პარლამენტის თავმჯდომარემ, დავით უსუფაშვილმა.
პარლამენტის თავმჯდომარის საქართველო-თურქეთის საპარლამენტო მეგობრობის ჯგუფის წევრებთან შეხვედრას ქართული მხრიდან ესწრებოდნენ: საგარეო ურთიერთობის კომიტეტის თავმჯდომარე თედო ჯაფარიძე, დიასპორისა და კავკასიის საკითხთა კომიტეტის თავმჯდომარე, თურქეთის რესპუბლიკის პარლამენტთან მეგობრობის ჯგუფის ხელმძღვანელი გუბაზ სანიკიძე, დიასპორისა და კავკასიის საკითხთა კომიტეტის თავმჯდომარის პირველი მოადგილე შალვა კიკნაველიძე და ფრაქცია „ერთიანი ნაციონალური მოძრაობის" წევრი დავით დარჩიაშვილი.