,,ერთიანი ნაციონალური" მოძრაობის ლიდერები დავით ბაქრაძე, გიგა ბოკერია, გიორგი ბარამიძე და გიორგი კანდელაკი ნატოს გენერალური მდივნის სპეციალურ წარმომადგენელს კავკასიასა და ცენტრალურ აზიაში ჯეიმს აპატურაის შეხვდნენ.
შეხვედრა ნატოს სამეკავშირეო ოფისში გაიმართა. როგორც შეხვედრის შემდეგ ,,ნაცმოძრაობის" წევრმა გიგა ბოკერიამ განმარტა ისაუბრეს იმ გამოწვევებზე რომელიც საქართველოსა და რეგიონში ამ დროისთვის არსებობს.
მისივე განმარტებით, შეხვედრაზე საუბარი ასევე შეეხო ქვეყნის შიგნით არსებულ მდგომარეობას.
,,ვისაუბრეთ შიდა ვითარებაზეც. საქართველოს ამოცანაა, ჰყავდეს მთავრობა, რომელიც იქნება თანმიმდევრული და აქტიური რომ ყველა ბარიერის მიუხედავად, გააგრძელოს საქართველოს დაახლოება ნატო-ში და არ შეუქმნას ჩვენ ქვეყანას პრობლემა არათანმიმდევრულობით, ხშირად აბსურდული პოლიტიკით და შიდა პოლიტიკური დევნით, რომელიც რა თქმა უნდა, ბარიერია ნატო-ში გაწევრიანების გზაზე",-განაცხადა ბოკერიამ.
