უკრაინის ჯანდაცვის ახალმა მინისტრმა პარლამენტის მიერ მისი კანდიდატურის დამტკიცების შემდეგ სპეციალური ბრიფინგი გამართა. ალექსანდრე კვიტაიშვილმა იმ გამოცდილებაზე ისაუბრა, რომელიც მას ჯანდაცვის სისტემასთან აკავშირებს და იმედი გამოთქვა, რომ უკრაინის ჯანდაცვის სფეროში წარმატებული რეფორმების გატარებას შეძლებს. ახალი მინისტრი უკრაინის მოსახლეობას ხელმისაწვდომ და ხარისხიან სამედიცინო მომსახურებას დაჰპირდა.
„მინდა ბოდიში მოგიხადოთ იმისთვის, რომ ამჯერად რუსულად ვისაუბრებ, რადგანაც დღეს ჩემი უკრაინული ისეთი დახვეწილი არ არის, მაგრამ გპირდებით, რომ მალე უკრაინულად გესაუბრებით. მე ვარ ალექსანდრე კვიტაშვილი. ორიოდე წუთის წინ ამირჩიეს უკრაინის ჯანდაცვის მინისტრად. ამ სისტემაში უკვე 15 წელია, ვმუშაობ და ყველა ის რეფორმა, რომელიც საქართველოში 1996 წლიდან ტარდებოდა, ჩემი მონაწილეობით ან უშუალო ხელმძღვანელობით ხორციელდებოდა. 2008-2010 წლებში მე ვიყავი საქართველოს ჯანდაცვისა და სოციალური უზრუნველყოფის მინისტრი. ვფიქრობ, ჩემი გამოცდილება უკრაინას დაეხმარება. ვიმედოვნებ, რომ უკრაინის ჯანდაცვის მოდერნიზება და რეფორმები გატარდება მაქსიმალურად უშეცდომოდ და უმტკივნეულოდ და უკრაინელ ხალხს ექნება ხარისხიანი სამედიცინო მომსახურება,"-განაცხადა კვიტაშვილმა.
