საქართველოს საგარეო საქმეთა მინისტრმა თამარ ბერუჩაშვილმა საგანგებო დავალებათა ელჩად დავით კერესელიძე წარადგინა და მისი ფუნქციების შესახებ ისაუბრა.
"დავით კერესელიძე, საგანგებო დავალებათა ელჩი, დღეიდან იქნება საგარეო საქმეთა სამინისტროს სპიკერი, პერსონა, რომელიც საზოგადოებას და მედიის წარმომადგენლებს მიაწვდის ინფორმაციას როგორც საგარეო საქმეთა სამინისტროს საქმიანობის გეგმების და პრიორიტეტების თაობაზე", - განაცხადა ჟურნალისტებთან მინისტრმა.
პირველი განცხადება გააკეთა საგანგებო დავალებათა ელჩმა. დავით კერესელიძემ საერთაშორისო საზოგადოების მიერ რუსეთსა და ოკუპირებულ აფხაზეთს შორის გაფორმებული ე.წ. ხელშეკრულებაზე ისაუბრა.
„ყველა განცხადებაში, რომელიც გაკეთდა საერთაშორისო თანამეგობრობის მხრიდან, რუსეთის ქმედება შეფასებულია, როგორც საერთაშორისო სამართლის ფუნდამენტური ნორმების და რუსეთს მიერ აღებული ვალდებულებების დარღვევა, როგორც საქართველოს ტერიტორიული მთლიანობის წინააღმდეგ მიმართული ნაბიჯი. ყველა მაღალი დონის განცხადებაში ჩვენი მოკავშირეების და პარტნიორების მიერ აღნიშნულია, რომ რუსეთის მიერ საქართველოს რეგიონთან დადებული ე.წ. ხელშეკრულება საფრთხის ქვეშ აყენებს რეგიონში სტაბილურობას და უსაფრთხოებას", - განაცხადა დავით კერესელიძემ.
დავით კერესელიძე ამ დრომდე ათენში შავი ზღვის კვლევის ცენტრის ალტერნატიულ დირექტორად მუშაობდა, ასევე იყო საქართველოს ელჩი დანიასა და ნორვეგიაში.