30 ნოემბრიდან - 2 დეკემბრის ჩათვლით, ევროპასთან ინტეგრაციის კომიტეტის თავმჯდომარე, ვიქტორ დოლიძე, ევროკავშირის ეროვნული პარლამენტების ევროპულ საქმეთა კომიტეტების კონფერენციაში (Conference of Parliamentary Committees for Union Affairs of Parliaments of the European Union - COSAC ) - კოსაკის საპრეზიდენტო ტროიკის სპეციალური მიწვევით, დამკვირვებლის სტატუსით მონაწილეობას მიიღებს კოსაკის პლენარულ სესიაში, რომელიც იტალიის დედაქალაქ რომში გაიმართება. როგორც ,,ჯი-ეიჩ-ენს" პარალემნტიდან აცნობეს ევროპასთან ინტეგრაციის კომიტეტის მიერ აქტიური საპარლამენტო დიპლომატიის წარმოების და ევროპის ეროვნულ პარლამენტებთან ორმხრივი ნაყოფიერი პარტნიორობის შედეგად, საქართველოს პარლამენტმა პირველად მოიპოვა შესაძლებლობა წარმოდგენილი იყოს ევროპის ერთ-ერთ პირველ საპარლამენტო ფორუმზე თანამშრომლობის გასაღრმავებლად და პოლიტიკური დიალოგის განვითარებისთვის.
კოსაკი აერთიანებს ევროკავშირის 28 წევრი სახელმწიფოს ეროვნული პარლამენტის ევროპულ საქმეთა კომიტეტებს და ევროპარლამენტის ხელმძღვანელობას. საპარლამენტო კომიტეტების ეს გაერთიანება 1989 წელს შეიქმნა, როდესაც ევროკავშირის დამფუძნებელი ქვეყნების პარლამენტის თავმჯდომარეები შეთანხმდნენ გაეძლიერებინათ ეროვნული პარლამენტების როლი ევროკავშირის პოლიტიკის შემუშავებაში.
კოსაკის საშუალებით ეროვნული პარლამენტები ევროკავშირის კანონმდებლობის შემუშავების პროცესში მონაწილეობენ, განიხილავენ ინიციატივებს მოქალაქეთა ცხოვრების ისეთ მნიშვნელოვან სფეროებში, როგორიცაა თავისუფლება, უსაფრთხოება და სამართლიანობა და თავიანთ პოზიციას უზიარებენ ევროკომისიას, ევროპარლამენტს და ევროკავშირის საბჭოს. სპეციალიზებული საპარლამენტო კომიტეტების ეს ფორუმი ხელს უწყობს პოლიტიკურ დიალოგს სახელმწიფოებს შორის და უზრუნველყოფს ინფორმაციის გაცვლას პარლამენტებს შორის.
კოსაკს ხელმძღვანელობს საპრეზიდენტო ტროიკა და პრეზიდენტ პარლამენტად გვევლინება ევროკავშირის საბჭოს პრეზიდენტი ქვეყნის პარლამენტი (ამჟამად იტალიის პარლამენტი). წელიწადში ორჯერ იმართება კოსაკის პლენარული სესია პრეზიდენტი ქვეყნის დედაქალაქში. სხდომებში მუდმივი დამკვირვებლის სტატუსით მონაწილეობის უფლება აქვს ევროკავშირში გაწევრიანების კანდიდატი ქვეყნების პარლამენტებს.