საქართველოს პრეზიდენტი გიორგი მარგველაშვილი ლატვიის პრეზიდენტის ვიზიტს საქართველოს ტერიტორიული მთლიანობისა და სუვერენიტეტის მხარდაჭერად აფასებს. როგორც მარგველაშვილმა ერთობლივ პრესკონფერენციაზე განმარტა მნიშვნელოვანია ლატვიის პრეზიდენტის ვიზიტი სწორედ მაშინ როცა საქართველოს სახელმწიფოებრიობის, სუვერენიტეტის საკითხი კიდევ ერთხელ მწვავედ დადგა.
,,უაღრესად მნიშვნელოვანია, რომ ეს ვიზიტი განხორციელდა სწორედ დღეს, მაშინ, როდესაც ჩვენი ქვეყნის წინაშე კიდევ ერთხელ, მწვავედ დადგა საკითხი ჩვენი სახელმწიფოებრიობის, სუვერენიტეტისა და მისი განმტკიცების. მაშინ როდესაც რუსეთის ფედერაციამ გადადგა კიდევ ერთი უხეში ნაბიჯი საქართველოს ტერიტორიული მთლიანობის მიმართ და ოკუპირებულ აფხაზეთთან გააფორმა ე.წ. ხელშეკრულება რომელსაც ეს ოკუპაცია, ფაქტობრივად, ანექსიის დონემდე მიჰყავს, ლატვიელი კოლეგის ასეთი წარმატებული ვიზიტი ხაზგასასმელია, რადგან ჩვენ ვხედავთ მეგობრობას, იმ მნიშვნელოვან აქცენტებს, რასაც ჰქვია საქართველოს ტერიტორიული მთლიანობის, ჩვენი ევროპული არჩევანის მხარდაჭერა. მინდა მადლიერებით აღვნიშნო ის, რომ ბალტიის ასამბლეა იყო პირველი, ვინც დაგმო ოკუპირებულ აფხაზეთთან ე.წ. ხელშეკრულების გაფორმება", - განაცხადა გიორგი მარგველაშვილმა ლატვიელ კოლეგასთან შეხვედრის შემდეგ.
