რუსეთსა და ოკუპირებულ აფხაზეთს შორის მოკავშირეობის შესახებ ე.წ. ხელშეკრულების ხელმოწერის გამო, კონსულტაციების გამართვის შესახებ საქართველოს პრეზიდენტის მოწოდებას, პარლამენტის თავმჯდომარე დავით უსუფაშვილი გამოეხმაურა.
უსუფაშვილი მზად არის, კონსულტაციებში ჩაერთოს და აცხადებს, რომ საქართველოს მოსახლეობამ, რაც შეიძლება მყარად და მტკიცედ უნდა განუცხადოს აგრესორს, რომ მისი ეს ნაბიჯები მარცხისთვის არის განწირული.
"როგორ წარმოგიდგენიათ, საქართველოს რომელიმე მოქალაქემ თქვას, რომ არ ჩაერთვება იმაში, რომ ერთად, საქართველოს მოსახლეობამ, რაც შეიძლება მყარად და მტკიცედ განვუცხადოთ ყველას, პირველ რიგში კი აგრესორს, რომ მისი ეს ნაბიჯები არის მარცხისთვის განწირული და რომ ჩვენ ქართველები, საქართველოს მოქალაქეები არასდროს შევეგუებით იმას, რაც სურს რუსეთს. ჩვენ შევეგუებით მხოლოდ იმას, რაც გვსურს ჩვენ და რაც ენდომება აფხაზ ხალხს, როდესაც მათ ექნებათ თავიანთი სურვილის თავისუფლად გამოთქმის და აღსრულების შესაძლებლობა", - განაცხადა უსუფაშვილმა.
