ფარული მოსმენების შესახებ კანონში შესატანი ცვლილებების ირგვლივ მიმდინარე განხილვას პარლამენტის თავმჯდომარე დავით უსუფაშვილი ეხმიანება. მისი თქმით, პარლამენტმა ისეთი კანონი უნდა მიიღოს, რომ მოქალაქეების უფლებები დაცული იყოს და ამავდროულად, სამართალდავებს კრიმინალთან ბრძოლის ეფექტური მექანიამები გააჩნდეთ.
"ის, რომ ვერსად დედამიწის ზურგზე ეს საკითხი ბოლომდე ვერ მოგვარდა, არ ნიშნავს, რომ ჩვენ ნაბიჯები ამ მიმართულებით არ უნდა გადავდგათ. ისიც უნდა გავითვალისწინოთ, რომ არის ბევრი ვარიანტი, საკითხმა საკმაოდ სერიოზული, პოლიტიკური დატვირთვა შეიძინა და არა მხოლოდ ტექნუკური მხარე, არამდ, პოლიტიკურადაც უნდა მოგვარდეს ეს პრობლემა. მე დიდი იმედი მაქვს, რომ პარლამენტში ეს მოხერხდება", - განუცხადა ჟურნალისტებს დავით უსუფაშვილმა.
პარლამენტში დარეგისტრირებულია ორი კანონპროექტი. დეპუტატებს საკითხზე საბოლოო გადაწყვეტილების მისაღებად ვადა 1-ელ დეკემბრამდე აქვთ.
კანონის ერთ-ერთი პროექტის მიხედვით, რომლის ავტორები ეკა ბესელია, გედევან ფოფხაძე და ირაკლი სესიაშვილი არიან, პერსონალურ ინფორმაციაზე წვდომა პერსონალური მონაცემების დაცვის ინსპექტორს და შსს-ს ექნება, თუმცა მოსმენის ნებართვას ორივე შემთხვევაში სასამართლო გასცემს.
მეორე პროექტის ავტორი პარლამენტის იურიდიულ საკითხთა კომიტეტის თავმჯდომარე ვახტანგ ხმალაძეა, რომლის მიხედვით, პერსონალურ მონაცემებზე წვდომა კომუნიკაციების ეროვნულ კომისიას ექნება.
არასამთავრობო ორგანიზაციები, რომლებიც პროცესში აქტიურად არიან ჩართულიი, ე.წ. "გასაღები"- ს შინაგან საქმეთა სამინისტროს ხელში დარჩენას ეწინააღმდეგებიან.
