თავდაცვის ყოფილი მინისტრი ბაჩო ახალაია სოციალურ ქსელში საქალაქო სასამართლოს დღევანდელ გადაწყვეტილებას დროულს უწოდებს და აცხადებს, რომ უკვე ათეულობით ქართველი პატრიოტი სამარცხვინო და უნამუსო ბრალდებებით კარგა ხანია ციხეში ზიან და მასაც ურჩევნია მათ რიგებში იყოს.
,,მინდა მივმართო ქართველ ხალხს, რომელშიც არ ვგულისხმობ კრიმინალებს, რადგან მათ ეროვნება არ აქვთ და არც V კოლონას, რომლებიც უბრალოდ რუსები არიან.გულწრფელად ვიტყვი, დღევანდელი გადაწყვეტილება იყო დროული, რადგან უკვე ათეულობით ქართველი პატრიოტი სამარცხვინო და უნამუსო ბრალდებებით კარგა ხანია მსჯავრდებულები არიან, ნამდვილად მირჩევნია ვიყო მათ რიგებში ვიდრე რამე სახით მათგან გამონაკლისი იმ უამრავი გამამართლებელი განაჩენების სახით, რაც აქამდე დამიგროვდა", _აცხადებს ახალია.
მისივე თქმით, სასამართლოს ავბნელი ძალების ბრალდებების გაზიარება კი შეიძლება იმით აიხსნას, რომ საქართველოს რუსული ხელისუფლება ასეთი სიბრიყვით ცდილობს ევროსაბჭოს ცნობილი რეზოლუციის განეიტრალებას.
,,სასამართლოს მხრიდან შავბნელი ძალების ბრალდებების უპირობო გაზიარება კი მხოლოდ იმით შეიძლება აიხსნას, რომ საქართველოს რუსული ხელისუფლება ასეთი სიბრიყვით ცდილობს ევროსაბჭოს ცნობილი რეზოლუციის განეიტრალებას, ფიქრობენ რომ ამით მიეცემათ ლეგიტიმური უფლება ღიად მიძახონ დამნაშავე, მაგრამ აქ ახალი არაფერია, ეს ხომ აქამდე ასე იყო.ამ ორი წლის მანძილზე კი ჩემი მოტივაცია იყო შეცდომაში შეყვანილი ქართველი ხალხისთვის კითხვებზე პასუხის გაცემა, ვფიქრობ ეს მოვახერხე.თუ ვინმე დღეს ვერ დამეთანხმება, დარწმუნებული ვარ ხვალ გაიზიარებს ჩემს ურყევ შეხედულებას, დღეს სინამდვილეში მიმდინარეობს რუსეთ-საქართველოს ომი სწორედ იმ ფორმით, რასაც ყოველდღე ვხედავთ. ჩვენი ამოცანა ძლიერი ქართული სახელმწიფო და აფხაზეთში დაბრუნებაა, ყველაფერი რაც დღეს ხდება სწორედ ამ ბრძოლას უკავშირდება, რომელშიც ჩვენ მხოლოდ გამარჯვების ვალდებულება გვაქვს და ამ გზაზე ტყვიების თუ ტანკების ძალის ციხით ჩანაცვლება არანაირი დაბრკოლება არ არის.ხოლო სასამართლო, რომელიც დღეს იმპერიალისტური ძალების იარაღია, შეიძლება კი არის ერთგვარი უნამუსო პრობლემა, მაგრამ მასთან მიმართებაში ჩვენ ყველას შეგვიძლია ჩვენი რეგიონის XX საუკუნის ერთერთი პროგრესული ლიდერის შეხედულება გავიზიაროთ, რომლის მიხედვით თუ უსამართლოდ გექცევა სასამართლო ეს შენი ბრალია, ხოლო ამ უსამართლობის გამომწვევი მიზეზების და მისი აღმსრულებლების გამოსწორებაც შენი ვალია, თავისუფალი მოქალაქის.საბოლოოდ კი იმას ვიტყვი, ჩვენ ვერაფერი შეგვაჩერებს საქართველოს თავისუფლებისთვის ბრძოლაში, ვერაფერი აგვაღებინებს ხელს სოხუმში დაბრუნებაზე, ვერც რუსული ტანკები და ვერც საქართველოს მოღალატე პოლიტიკოსთა მთელი არმია. წინ მხოლოდ აფხაზეთი იქნება!", _აცხადებს ახალაია.
თბილისის საქალაქო სასამართლოს მოსამართლის ბესიკ ბუგიანიშვილის გადაწყვეტილებით, თავდაცვის ყოფილ მინისტრს ბაჩო ახალაის 7 წლითა და 6 თვით თავისუფლების აღკვეთა მიესაჯა. რაც შეეხება ამავე საქმეში სხვა ბრალდებულებს ლევან ქარდავასა და გიორგი მაზმიშვილს 11 წლიანი ხოლო მეგის ქარდავას 7 წლითა და 6 თვით პატიმრობა მიესაჯა.
შეგახსენებთ, რომ საქმე ეხება 2006 წლის 12 იანვარს ნავთლუღის ტერიტორიაზე ჩატარებულ სპეცოპერაციას, რომელსაც 3 ახალგაზრდის ლიკვიდაცია მოჰყვა. აღნიშნულ საქმეში ბრალდებულებს ლევან ქარდავასა და გიორგი მაზმიშვილს ბრალად განზრახ მკვლელობა ედებოდათ. ამ საქმეზე კიდევ ერთი ბრალდებულია კუდის ყოფილი უფროსი დათა ახალაია, რომლის საქმე ცალკეა გამოყოფილი და მასაც ასევე გაზრახ მკვლელობა ედება ბრალად.