ჟიული შარტავა აფხაზეთის და მთლიანად საქართველოს უდიდესი გმირია, - ამის შესახებ სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ყოვლადწმინდა სამების საკათედრო ტაძარში ჯვართამაღლების დღესასწაულზე ქადაგებისას განაცხადა.
"მე არ შემიძლია დღეს არ გავიხსენო ჟიული შარტავა, რომელიც მსხვერპლად შეეწირა. წინა დღეს ქუთათელ-გაენათელმა მიტროპოლიტმა და სხვებმა ინახულეს იგი. ჟიული შარტავას მაღლა აუწევია ხელები და უთქვამს, ღმერთო, ისევ მე დამსაჯე და საქართველო გადაარჩინეო, და მართლაც ეს მოხდა. ჟიული შარტავა არის უდიდესი პიროვნება, უდიდესი გმირი აფხაზეთისა და მთლიანად საქართველოს", - ბრძანა უწმინდესმა.
პატრიარქმა გაიხსენა, რომ მან უცნობი პირისგან წერილი მიიღო, რომელიც აღნიშნავდა, რომ იგი შემთხვევით შეესწრო ჟიული შარტავას დახვრეტას და მისი სახელი და გვარი ასანთის კოლოფზე ჩაიწერა.
უცნობი პირი პატრიარქს წერდა, რომ ისინი უნდა ამაყობდნენ, რადგან ჰყავთ ასეთი გმირი, როგორიც არის ჟიული შარტავა.
პატრიარქმა ბრძანა, რომ ჟიული შარტავა უკვე სასუფევლის მკვიდრია და ის ლოცულობს საქართველოს მთლიანობისა და მშვიდობისათვის.
