განათლების, მეცნიერებისა და კულტურის კომიტეტმა სსიპ ივანე ჯავახიშვილის სახელობის თბილისის სახელმწიფო უნივერსიტეტის მიერ წარმოდგენილი საკანონმდებლო ინიციატივა მიიღო, რომელიც „უმაღლესი განათლების შესახებ" საქართველოს კანონში ცვლილების შეტანას ითვალისწინებს.
მომხსენებლის, თბილისის სახელმწიფო უნივერსიტეტის რექტორის, ვლადიმერ პაპავას ინფორმაციით, კანონპროექტი უმაღლესი საგანმანათლებლო დაწესებულებების მიერ, თავიანთი ბიუჯეტის ფარგლებში, დაწესებულების წინაშე განსაკუთრებული დამსახურების მქონე პირთათვის ანაზღაურების მიცემის შესაძლებლობას ითვალისწინებს. როგორც ,,ჯი-ეიჩ-ენს" პარლამენტიდან აცნობეს სხდომაზე პირველი მოსმენით განიხილეს განათლების, მეცნიერებისა და კულტურის კომიტეტის მიერ საკანონმდებლო ინიციატივის წესით წარმოდგენილი კანონპროექტი „უმაღლესი განათლების შესახებ" საქართველოს კანონში ცვლილების შეტანის თაობაზე.
კომიტეტის თავმჯდომარის, ივანე კიღურაძის განცხადებით, კანონპროექტი მიზანი იმ პირთა უფლებრივი მდგომარეობის აღდგენაა, რომლებსაც 2007 წლამდე მინიჭებული ჰქონდათ დოცენტის ან პროფესორის სამეცნიერო-პედაგოგიური წოდება შესაბამის სახელოვნებო-შემოქმედებით ან არქიტექტურის სფეროში. წარმოდგენილი ცვლილების მიხედვით ისინი უფლებრივი მდგომარეობით დოქტორის აკადემიური ხარისხის მქონე პირებს გაუთანაბრდნენ. კანონპროექტის მიხედვით, ტერმინი „საშემსრულებლო-შემოქმედებითი" ჩანაცვლდება ტერმინით - „სახელოვნო-შემოქმედებითი".
ცვლილების მიხედვით, არქიტექტურის სფეროს წარმომადგენლებს საშუალება მიეცემათ, სრულფასოვნად ჩაერთონ საგანმანათლებლო და სამეცნიერო-კვლევით საქმიანობაში, დაიკავონ აკადემიური თანამდებობები, გახდნენ სადისერტაციო საბჭოს წევრები და ა.შ.კომიტეტის წევრებმა კანონპროექტს მხარი დაუჭირეს.
კომიტეტის სხდომაზე განიხილეს აკადემიკოსების - თამაზ გამყრელიძის, ჯონი ხეცურიანის, მზექალა შანიძისა და გუჩა კვარაცხელიას, ასევე, აკადემიის წევრ-კორესპონდენტების - ავთანდილ არაბულისა და ფილოლოგიის მეცნიერებათა კანდიდატ ლევან ღვინჯილიას მიერ წარმოდგენილი საკანონმდებლო წინადადება „სახელმწიფო ენის შესახებ" საქართველოს კანონის პროექტთან დაკავშირებით. მომხსენებლის, ავთანდილ არაბულის განცხადებით, კანონპროექტი მიზნად სახელმწიფო ენის დაცვასა და ენის კონსტიტუციური სტატუსის განმტკიცებას ისახავს და სახელმწიფო ენის დაცვის სპეციალიზებულ ინსტიტუტებად სახელმწიფო ენის დეპარტამენტსა და სახელმწიფო ენის მუდმივმოქმედ სახელმწიფო კომისიას განსაზღვრავს. განათლების, მეცნიერებისა და კულტურის კომიტეტმა წარმოდგენილი ინიციატივა მიიღო.