ოფიციალური თბილისი საერთაშორისო თანამეგობრობას მოუწოდებს, რუსეთის დესტრუქციულ ქმედებებს სათანადო შეფასება მისცეს. ამის შესახებ საქართველოს საგარეო საქმეთა სამინისტროს განცხადებაშია ნათქვამი. აღნიშნული განცხადება გრიგოლ ვაშაძის უწყებამ რუსეთის ფედერაციის სახელმწიფო სათათბიროს მიერ რუსეთსა და მარიონეტულ რეჟიმებს შორის ე. წ. "საზღვრის დაცვის ერთობლივი ძალისხმევის თაობაზე" 2009 წლის 30 აპრილს დადებულ შეთანხმებებასთან დაკავშირებით გაავრცელა და რომლის რატიფიცირებაც დღეს მოხდა.
"საქართველო მოუწოდებს საერთაშორისო თანამეგობრობას, სათანადო შეფასება მისცეს რუსეთის დესტრუქციულ ქმედებებს და გაააქტიუროს ძალისხმევა საქართველოს ტერიტორიის განუყოფელი ნაწილების ოკუპაციისა და ანექსიის აღკვეთის მიზნით", - ნათქვამია განცხადებაში.
უშუალოდ აღნიშნულ ფაქტს კი ოფიციალური თბილისი რუსეთის ფედერაციის მიერ გადადგმულ მორიგ პროვოკაციულ ნაბიჯად აფასებს, რომელიც საერთაშორისო სამართლის ფუძემდებლური პრინციპებისა და ნორმების უხეშ დარღვევას, ცეცხლის შეწყვეტის შესახებ 6-პუნქტიანი შეთანხმების დემონსტრაციულ იგნორირებას, სუვერენული სახელმწიფოს საერთაშორისოდ აღიარებული სახელმწიფო საზღვრების ძალადობრივი ცვლილების ლეგიტიმაციის მცდელობას და ოკუპირებული ტერიტორიების ანექსიის მიზანმიმართული პოლიტიკის კიდევ ერთ გამოვლინებას წარმოადგენს.
"საერთაშორისო-სამართლებრივი თვალსაზრისით ოკუპანტ ქვეყანასა და მის მიერვე შექმნილ მარიონეტულ რეჟიმებს შორის დადებული ნებისმიერი შეთანხმება იურიდიული ძალის არმქონე და ბათილია", - აღნიშნულია განცხადებაში.