ოს სეპარატისტთა ლიდერის ე. წ. რწმუნებული პოსტკონფლიტური დარეგულირების საკითხში ბორის ჩოჩიევი ჟენევის საერთაშორისო მოლაპარაკებების მორიგ რაუნდზე საუბრობს და აცხადებს, რომ ქართულმა მხარემ ამდენხანს ვერ გაიგო, ვის და ვის შორის უნდა გაფორმდეს ხელშეკრულება ძალის გამოუყენებლობის შესახებ.
"საქართველომ თავდაუსხმელობის ხელშეკრულებას ხელი აფხაზეთთან და სამხრეთ ოსეთთან უნდა მოაწეროს და არა რუსეთთან. საქართველო კი სწორედ რუსეთთან გასაფორმებელ ამგვარ ხელშეკრულებაზე საუბრობს. თუმცა თუკი იმას გავითვალისწინებთ, რომ საქართველო უკვე დიდი ხანის მოწყდა რუსეთს, არაა გამორიცხული, რომ მათ რუსული ენაც ცუდად ესმით უკვე. ალბათ, ამიტომაც ვერ დავიდა ქართულ მხარემდე ამდენხანს, რომ საკითხი აგრესორი საქართველოს მიერ აფხაზეთთან და სამხრეთ ოსეთთან ხელშეკრულების გაფორმებას ეხება", _ აცხადებს ჩოჩიევი და დასძენს, რომ მისი აზრით, ამ მოვლენის "ქართული მხარის ამგვარი ხედვით სასურველი შედეგის მიღწევა საეჭვოა".
შეგახსენებთ, რომ ოს სეპარატისტთა დელეგაცია ჟენევის საერთაშორისო მოლაპარაკებათა მეათე რაუნდში მონაწილეობის მისაღებად დღეს გაემგზავრა. ჟენევის საერთაშორისო მოლაპარაკებების I რაუნდი 2008 წლის 15 ოქტომბერს გაიმართა. II რაუნდი _ 2008 წლის 19 ნოემბერს. III რაუნდი _ 2008 წლის 17-18 დეკემბერს. IV რაუნდი _ 2009 წლის 17-18 თებერვალს. V რაუნდი _ 2009 წლის 18-19 მაისს. VI რაუნდი _ 1-2 ივლისს. VII რაუნდი _ 2009 წლის 17 სექტემბერს, VIII რაუნდი _ 2009 წლის 11 ნოემბერს, ხოლო _ IX რაუნდი 2010 წლის 28 იანვარს.
