საკრებულოს თავმჯდომარის მოადგილემ, ფრაქცია "ქართული ოცნება -დემოკრატიული საქართველოს'' წევრმა ჯაბა სამუშიამ დედაქალაქის ყოფილი მერი, გიგი უგულავა კომპანია "სითი პარკთან" გარიგებაში კიდევ ერთხელ დაადანაშაულა და ის დოკუმენტები წარმოადგინა, რომლის მიხედვითაც დედაქალაქის ბიუჯეტმა დიდი მოცულობის თანხა დაკარგა.
ჯაბა სამუშიამ "სითი პარკის" ხელმძღვანელობა ათობით მილიონი ლარის მითვისებაში დაადანაშაულა, რომელიც დედაქალაქის მაცხოვრებლების კეთილდღეობაზე უნდა ასახულიყო. მისივე განმარტებით კომპანიას თბილისის ბიუჯეტში 2008-2013 წწ. გადარიცხული აქვს მხოლოდ 3 მილიონი ლარი. ჯაბა სამუშიამ შინაგან საქმეთა სამინისტროს მონაცემებიც წარმოადგინა, რომლის მიხედვითაც დედქალაქში აღრიცხულია 420 ავტომობილი და მათ 50%-ს, რომ ეყიდა 50ლარის ოდენობის ქვითარი, ეს თანხა წლიურად 6 მილონ ლარს შეადგენდა.
ჯაბა სამუშიას განცხადებით, ის როგორც საკრებულოს წევრი 2010 წლიდან მუშაობდა აღნიშნულ საკითხზე და დედაქალაქის მერიისგან არაერთხელ მოითხოვა ის სრული სახელშეკრულებო პირობები, რომელიც კომპანია "სითი პარკთან" გაფორმდა, თუმცა მერია მისი გასაჯაროებისგან ყოველთვის თავს იკავებდა. საკრებულოს თავმჯდომარის მოადგილის განმარტებით სატენდერო პირობები შეთანხმებული იყო გიგი უგულავასთან, ასე რომ ნებისმიერი პროცედურა რომელსაც ხელშეკრულების პირობები არეგულირებდა, სწორედ მასთან თანხმდებოდა.
საკრებულოს თავმჯდომარემ საქართველოს მთავარ პროკურატურას მიმართა და "სითი პარკის" ყოველწლიური საქმიანობის შესწავლა სთხოვა, რამდენადაც იგი მსხვილ კორუფციულ გეგმას მოიცავს, რომელშიც გიგი უგულავას დანაშაულებრივი ქმედებები იკვეთება და ათობით მილიონ ლარს ეხება.
შეგახსენებთ, რომ ფინანსთა სამინისტროს საგამოძიებო სამსახურმა, სამსახურეობრივი მდგომარეობის გამოყენებით, სახელმწიფო ბიუჯეტის კუთვნილი დიდი ოდენობით თანხების გაფლანგვის ფაქტზე, სისხლის სამართლის პასუხისგებაში მისცა ქ.თბილისის ყოფილი მერი გიორგი უგულავა.
გამოძიებით დგინდება, რომ 2007 წლის 07 დეკემბერს, შპს „სი-ტი პარკსა" და ქ.თბილისის მთავრობას შორის გაფორმდა ხელშეკრულება ,,პარკირების სფეროს მართვის უფლების იჯარის გაცემის შესახებ", რომლის თანახმად თბილისში პარკირების მომსახურების გაწევა გადავიდა ექსკლუზიურად შპს „სი-ტი პარკ"-ზე, რომლიდანაც მიღებული შემოსავლის (ჯარიმების) 60%-ს მიიღებდა ქ.თბილისის მთავრობა, ხოლო 40%-ს შპს „სიტი პარკი". ამავე ხელშეკრულების თანახმად, შპს „სი-ტი პარკს" მიეცა საქართველოს ადმინისტრაციულ სამართალდარღვევათა კოდექსის 125-ე მუხლის მე-8 ნაწილით - საგზაო მოძრაობის წესების დარღვევისათვის და ამავე კოდექსის 1252 მუხლით დედაქალაქის ტერიტორიაზე ავტოტრანსპორტის პარკირების წესების დარღვევისათვის მოქალაქეთა დაჯარიმების უფლება.
საქართველოს საბიუჯეტო კოდექსის თანახმად - საგზაო მოძრაობის წესების დარღვევისათვის მიღებული შემოსავლის 40% უნდა წარიმართოს ცენტრალურ ბიუჯეტში, 60% ადგილობრივი ბიუჯეტში, ხოლო ამავე კანონის თანახმად, პარკირების წესების დარღვევისთვის შედგენილი საჯარიმო თანხები ავტომატურად მიიმართება ქ. თბილისის თვითმმართველი ერთეულის ბიუჯეტში.
მიუხედავად აღნიშნულისა, გიორგი უგულავამ, რომელსაც 2006-2013 წლებში ეკავა ქ.თბილისის მერის თანამდებობა, სამსახურებრივი მდგომარეობის გამოყენებით, შპს ,,სი-ტი პარკი''-ს მიანიჭა არამართლზომიერი უპირატესობა, რაც გამოიხატა სახელმწიფო სახსრების არამიზნობრივი განკარგვით ზემოაღნიშნული კომპანიისათვის შემოსავლის ხელოვნურად გაზრდაში.
კერძოდ, გიორგი უგულავამ შპს ,,სი-ტი პარკი''-ს სასარგებლოდ, 2009 წლის 11 თებერვალს გამოცემული ბრძანების დანართში განზრახ არასწორი სახაზინო კოდი მიუთითა, რის საფუძველზე საგზაო მოძრაობის წესების დარღვევისთვის თბილისელების მიერ გადახდილი ჯარიმის თანხის 40%, ნაცვლად სახელმწიფო ბიუჯეტისა, გადაირიცხა შპს ,,სი-ტი პარკი''-ს ანგარიშზე.
ამავდროულად, გიორგი უგულავას გადაწყვეტილებით, ქ.თბილისის მერიასა და შპს ,,სი-ტი პარკს" შორის გაფორმებულ ხელშეკრულებაში 2011 წლის 06 აპრილს შევიდა ცვლილება N3, რის საფუძველზე კვლავ კომპანიის სასარგებლოდ შეიცვალა ჯარიმებიდან მიღებული შემოსავლების განაწილების წესი, კერძოდ: მიუხედავად იმისა, რომ იმ დროისათვის შპს ,,სი-ტი პარკი" თბილისში საქმიანობით სოლიდური მოგებას იღებდა და სახელმწიფოს მხრიდან არ არსებობდა კომპანიისათვის რაიმე დამატებითი შეღავათის დაწესების აუცილებლობა, შპს „სი-ტი-პარკმა" ხსენებული ცვლილებით თბილისელების მიერ გადახდილი თითოეული ჯარიმიდან დამატებით მიიღო 3 ლარი, 40% წარიმართა კომპანიის ანგარიშზე.
ამდენად, ქ.თბილისის მერმა - გიორგი უგულავამ, ცენტრალური ბიუჯეტის განზრახ იგნორირებით, კანონთან შეუსაბამო ბრძანების საფუძველზე შპს ,,სი-ტი პარკის"-თვის დამატებითი შეღავათების დაწესებით, კომპანიის სასარგებლოდ მთლიანობაში გაფლანგა სახელმწიფოს კუთვნილი დიდი ოდენობით თანხა - 1 086 718 ლარის ოდენობით.
საქმეზე გრძელდება გამოძიება საქართველოს სისხლის სამართლის კოდექსის 182-ე მუხლის მეორე და მესამე ნაწილებით, რაც სასჯელის სახედ და ზომად ითვალისწინებს თავისუფლების აღკვეთას 7-დან 11 წლამდე ვადით.
