რა არის ყადაღა
ყადაღა არის საჯარო-სამართლებრივი შეზღუდვის ერთ-ერთი სახე, რომელიც შეიძლება დაედოს როგორც უძრავ, ასევე მოძრავ ნივთსა და არამატერიალურ ქონებრივ სიკეთეს.
ყადაღის დადება შეუძლია სასამართლოს/საარბიტრაჟოს ან უფლებამოსილ სხვა ადმინისტრაციული ორგანოს (სსიპ აღსრულების ეროვნული ბიურო, სსიპ შემოსავლების სამსახური, სხვა).
ნივთსა და არამატერიალურ ქონებრივ სიკეთეზე ყადაღის რეგისტრაცია გამორიცხავს ამ ნივთსა და არამატერიალურ ქონებრივ სიკეთეზე რაიმე სხვა უფლების ან საკუთრების უფლების მიტოვების რეგისტრაციას (თუ ყადაღის სარეგისტრაციო შესაბამისი დოკუმენტით სხვა რამ არ არის დადგენილი).
ეს შეზღუდვა არ ვრცელდება: ა) ყადაღადადებული უძრავი ნივთის მართლზომიერი მფლობელის საკუთრების უფლების ან ყადაღადადებული ნივთისა და არამატერიალური ქონებრივი სიკეთის საქართველოს კანონმდებლობით დადგენილი წესით იძულებითი განკარგვის შედეგად წარმოშობილი უფლების რეგისტრაციაზე; ბ) უფლების სუბიექტისა და ობიექტის საიდენტიფიკაციო მონაცემთა ცვლილების რეგისტრაციაზე; გ) რეგისტრირებული უფლების (გარდა საკუთრების უფლებისა) შეწყვეტაზე.
დაუშვებელია ყადაღის რეგისტრაცია, თუ ნივთზე და არამატერიალურ ქონებრივ სიკეთეზე ყადაღის რეგისტრაციის მოთხოვნის წარდგენის მომენტისათვის ეს ნივთი ან არამატერიალური ქონებრივი სიკეთე სხვა პირის საკუთრებაშია.
ასევე დაუშვებელია ყადაღის რეგისტრაცია თუ უფლების დამდგენი სარეგისტრაციო დოკუმენტი ყადაღის რეგისტრაციამდე ან ,,საჯარო რეესტრის შესახებ" საქართველოს კანონის ამოქმედებამდეა გამოცემული, მიღებული ან შედგენილი (კანონი ამოქმედდა 2009 წლის 14 იანვრიდან).
აღსანიშნავია, რომ თუ მოთხოვნილია ყადაღის რეგისტრაცია, ხოლო მისი რეგისტრაციის შესახებ გადაწყვეტილების მიღებამდე ასევე მოთხოვნილია სხვა უფლების რეგისტრაცია, რომელიც ეწინააღმდეგება აღნიშნული ყადაღის შინაარსს, ჯერ მიიღება ყადაღის რეგისტრაციასთან დაკავშირებული შესაბამისი გადაწყვეტილება, ხოლო შემდეგ - გადაწყვეტილება სარეგისტრაციოდ წარმოდგენილი სხვა უფლების შესახებ.
ყადაღის რეგისტრაციის წესი და პირობები
ყადაღის რეგისტრაციის წარმოშობის, ცვლილების და შეწყვეტის რეგისტრაციისათვის, დაინტერესებულმა პირმა უნდა მიმართოს საჯარო რეესტრის ეროვნული სააგენტოს ტერიტორიულ სამსახურს ან იუსტიციის სახლს.
სარეგისტრაციოდ წარსადგენი დოკუმენტები:
1) განცხადება (აღნიშნული ივსება შესაბამის ელექტრონულ პროგრამაში უშუალოდ დოკუმენტების მიმღები ოპერატორის მიერ);
2) დაინტერესებული პირის პირადობის დამადასტურებელი დოკუმენტის ასლი;
3) ყადაღის წარმოშობის დამადასტურებელი დოკუმეტი (სასამართლოს/საარტბიტრაჟოს გადაწყვეტილება, აღსრულების ეროვნული ბიუროს მომართვა და სხვა);
ყადაღის ცვლილების და შეწყვეტის რეგისტრაციისას - ყადაღის ცვლილების ან მისი შეწყვეტის დამადასტურებელი კანონიერ ძალაში შესული დოკუმენტი.
4) მომსახურების საფასურის გადახდის დამადასტურებელი დოკუმენტი - 20 ლარი (3 სამუშაო დღის ვადაში)
ყადაღის შეწყვეტის რეგისტრაცია ხორციელდება 3 სამუშაო დღის ვადაში მომსახურების საფასურის გადახდის გარეშე.
სარეგისტრაციო ვადის ათვლა იწყება განცხადების შეტანის/რეგისტრაციის მომდევნო დღეს და მთავრდება ვადის ბოლო დღის გასვლასთან ერთად. თუ ვადის ბოლო დღე ემთხვევა უქმე ან დასვენების დღეებს, ვადის ბოლო დღეს წარმოადგენს მომდევნო სამუშაო დღე.
დამატებითი ინფორმაცია
• თუ დაინტერესებულ პირს რეგისტრაციის განხორციელება სურს არა პირადად, არამედ წარმომადგენლის მეშვეობით, ასეთ შემთხვევაში დამატებით უნდა იქნეს წარმოდგენილი სათანადო წესით დამოწმებული წარმომადგენლობის დამადასტურებელი დოკუმენტი და წარმომადგენლის პირადობის დამადასტურებელი დოკუმენტის ასლი.
• ზემოჩამოთვლილი დოკუმენტების გარდა, საჯარო რეესტრის ეროვნული სააგენტოს მხრიდან კონკრეტულ შემთხვევაში შესაძლებელია დამატებით მოთხოვნილ იქნეს ნებისმიერი დოკუმენტი/ინფორმაცია, რაც აუცილებელია ყადაღის რეგისტრაციისათვის.
• ნივთსა და არამატერიალურ ქონებრივ სიკეთეზე სახელმწიფოს, თვითმმართველი ერთეულის და საქართველოს ეროვნული ბანკის სასარგებლოდ დადებული ყადაღის წარმოშობის რეგისტრაციის შემთხვევაში რეგისტრაცია ხორციელდება მომსახურების საფასურის გადახდის გარეშე.
