რუსეთმა, უკრაინამ და ევროკავშირმა ბრიუსელში გაზის ფასის შესახებ გამართული მოლაპარაკებების მეხუთე რაუნდზე შეთანხმებას კვლავ ვერ მიაღწიეს. ინფორმაციას ამის შესახებ „ბი-ბი-სი" ავრცელებს. ევროკომისარი ენერგეტიკის საკითხებში გიუნტერ ეტინგერი აცხადებს, რომ მოლაპარაკებების მეექვსე რაუნდი შესაძლოა დღეს ან ხვალ გაიმართოს.
მოლაპარაკებები ბრიუსელში ამ საკითხზე შვიდ საათზე მეტხანს გრძელდებოდა. მისი დაწყების წინ უკრაინის ენერგეტიკის სამინისტროს წარმომადგენელმა იური პროდანმა განაცხადა, რომ კიევი კვლავინდებურად მზადაა გადაიხადოს გაზის დავალიანება, მხოლოდ მას შემდეგ, რაც მოხდება შეთანხმება გაზის ფასზე.
რუსეთის წარმომადგენლებს ამ საკითხთან მიმართებაში სხვა პოზიცია აქვთ. ისინი მზად არიან გაზზე ფასის დაკლებაზე ისაუბრონ და უარი თქვან საფასურის წინასწარ გადახდაზე, მხოლოდ იმ შემთხვევაში, თუ კიევი თანხმობას განაცხადებს გაზის დავალიანება დაფაროს.
საუბარი მიდის დავალიანების დაფარვაზე ნოემბრისა და დეკემბრის თვეში მოხმარებულ გაზზე, 1,45 მილიარდ აშშ დოლარზე და აპრილსა და მაისში მოხმარებული გაზის საფასურის გადახდის გრაფიკის შეთანმებაზე საერთო თანხით - 3 მილიარდი აშშ დოლარი.