მისი თქმით, რუსეთის ქმედება კიდევ ერთხელ მიუთითებს იმას, რომ "გრძელდება საქართველოსთვის ტერიტორიების წართმევის პროცესი". თუმცა იგი აქცენტს აკეთებს იმაზე, რომ რუსეთი არღვევს საერთაშორისო სამართალს და მიიჩნევს, რომ ხელისუფლებამ რეაგირება სწორედ ამ მიმართულებით უნდა მოახდინოს.

"სოხუმის აეროპორტში ფრენების შეწყვეტის გადაწყვეტილება იკაომ 1993 წელს მიიღო და ამ გადაწყვეტილების შეცვლა მხოლოდ ამ ორგანიზაციას შეუძლია. ამიტომ საგარეო საქმეთა სამინისტრო ამ ორგანიზაციის ბერკეტების გამოყენებას უნდა ცდილობდეს" - აცხადებს პაატა დავითაია.

გარდა ამისა მისი თქმით პრობლემაა ისიც, რომ შამბამ გამოაცხადა ტენდერი სოხუმის აეროპორტის სარეაბილიტაციო სამუშაოების ჩატარებასთან დაკავშირებით და ტენდერში მონაწილეობის სურვილი იორდანიამ და თურქეთმა გამოთქვეს.

"საქართველომ უნდა მიმართოს ამ ქვეყნების ხელისუფლებას, რომ მათმა წარმომადგენლებმა არ მიიღონ ამ ტენდერში მონაწილეობა. თურქეთი არის ჩვენი პარტნიორი ქვეყანა და ასევე იკაოს წევრი, ამიტომაც საჭიროა მიზანმიმართული მუშაობა" - აცახდებს პაატა დავითაია და დასძენს, რომ "დაუყონებლივ უნდა დაიწყოს გამოძიება იმის დასადგენად თუ ვინ აპირებს ფრენას და განხორციელდეს კომპლექსური სამუშაოები სწორედ საერთაშორისო ორგანიზაციის მეშვეობით"

დავითაიას ამ განცხადების საპასუხოდ ტერიტორიული მთლიანობის აღდგენის კომისიის თავმჯდომარემ შოთა მალაშხიამ კი განაცხადა, რომ საგარეო საქმეთა სამინისტროს ამ მიმართულებით მუშაობა დაწყებული აქვს და პარლამენტის თანხმობის შემთხვევაში კომისია გამართავს სხდომას, სადაც მოწვეული იქნება სს სამინისტროს წარმომადგენელი და დეპუტატებს მიაწოდებს ინფორმაციას აღნიშნულ საკითხთან დაკავშირებით. კომისიის სხდომის ჩატარებას პარლამენტის თავმჯდომარეც დადებითად აფასებს.

"ეს აის კარგი მეთოდი იმისთვის, რომ დეპუტატებმა გაიგონ რა კეთდება და ასევე იმსჯელონ იმაზე თუ რა უნდა გაკეთდეს" - აცხადებს ბაქრაზე და დასძენს, რომ აღნიშნული საკითხით დაინტერესებულ პირებს ინფორმაციის მიღება კომისიის სხდომაზე შეეძლებათ.