საგარეო საქმეთა მინისტრის მოადგილის ნინო კალანდაძის განცხადებით, რუსეთ-ბელორუს-ყაზახეთის საბაჟო კავშირის ამოქმედების შემდეგ, საქართველო-რუსეთის სავაჭრო ურთიერთობებში არაფერი შეიცვლება.
"ბელორუსთან და ყაზახეთთან ერთიანი ეკონომიკური სივრცის შექმნის მიუხედავად, საქართველო-რუსეთის სავაჭრო ურთიერთობებში არაფერი შეიცვლება... აღნიშნული საბაჟო კავშირის ამოქმედების შემდეგ, ბელორუსიდან და ყაზახეთიდან რუსეთის ბაზარზე ქართული ღვინო და მინერალური წყალიც მხოლოდ იმ შემთხვევაში მოხდება, თუ მასზე რუსეთი ემბარგოს მოხსნის, რაც თავის დროზე ცალმხრივი გადაწყვეტილებით დაწესდა. ამ ცალმხრივი გადაწყვეტილების შეცვლა კი ცალმხრივადვე შეიძლება მოხდეს და ის სახელმწიფოთა შორის რაიმე ხელშეკრულების გაფორმებას არ საჭიროებს", - განუცხადა ნინო კალანდაძემ ჟურნალისტებს რუსულ ბაზარზე ქართული პროდუქციის შესაძლო დაბრუნებაზე კომენტირებისას.
ამასთან, მისი განმარტებით, ზოგადად, რუსეთ-საქართველოს შორის სავაჭრო ურთიერთობების საკითხზე საუბრისას ორი მიმართულების გამიჯვნა უნდა მოხდეს - რა ხდება ამ მიმართულებით კერძო დონეზე და სახელმწიფო დონეზე.
"კერძო მოლაპარაკებებში ჩვენ არ ჩავერევით და თუ კომპანიების მხრიდან შესაბამისი სურვილი იარსებებს, სავაჭრო ურთიერთობების აღდგენა შესაძლებელი იქნება, თუმცა სახელმწიფო დონეზე ეს საკითხი ამ ეტაპზე არ დგას, რადგან ქვეყნებს შორის, როგორც ცნობილია, დიპლიმატიური ურთიერთობები შეწყვეტილია", - დასძინა კალანდაძემ.
