,,ბათუმი თაუერი" რამდენიმე ინვესტორის მიერ აქტიურად იხილება სხვადასხვა ქვეყნებიდან. კომპანიების დასახელება თქვენ არაფერს არ გეტყვით და ალბათ უახლოეს პერიოდში გარკვეული გადაწყვეტილება მიღებული იქნება. სამწუხაროდ, ამ შენობის თვითღირებულება ძალიან მაღალია და მისი თვითღირებულების რეალიზაცია ვერ ხორციელდება. ამიტომ ვიხილავთ სხვა ვარიანტებს, სახელმწიფოს მხრიდან გრძელვადიანი იჯარის და ა.შ. ვფიქრობთ რომ, შესაძლებელი იქნება საჯარო და კერძო სტრუქტურებს შორის თანამშრომლობის ფორმატში დღევანდელი ხელშეკრულების გაფორმება იმისთვის, რომ შენობა სასტუმროსთვის გამოყენებული იქნას", _განაცხადა კვირიკაშვილმა.
შეგახსენებთ, რომ 2013 წლის შემაჯამებელ პრესკონფერენციაზე ეკონომიკისა და მდგრადი განვითარების მინისტრმა გიორგი კვირიკაშვილმა განმარტა, რომ „ბათუმი თაუერში" 4 ვარსკვლავიანი სასტუმრო განთავსდება.
„დღეისათვის უკვე 4-5 ინვესტორმა გამოთქვა ტენდერში მონაწილეობის სურვილი. ინტერესია 4-ვარსკვლავიანი სასტუმროს განთავსებაზე. ახლა მზადდება სატენდერო წინადადება და უახლოეს ერთ თვეში გამოცხადდება ტენდერი. ალბათ, პირველ კვარტალში ამ შენობას ინვესტორი ეყოლება"-განაცხადა მინისტრმა.
აღსანიშნავია, რომ „ბათუმი თაუერში" ტექნოლოგიური უნივერისიტეტის განთავსება იგეგმებოდა. შენობა ამ დროისათვის, შპს „ბათუმი ტაუერის" ბალანსზეა, რომლის დამფუძნებელიც საქართველოს ეკონომიკისა და მდგრადი განვითარების სამინისტროა. შენობის ასაშენებლად 78 მლნ ლარი უკვე დახარჯულია და მშენებლობის დასასრულებლად მშენებელ კომპანიას 6 მილიონიანი ვალდებულება აქვს, თუმცა, როგორც აჭარის მთავრობის მეთაურის მიერ 2013 წლის ივლისში გაკეთებული განცხადებიდან ირკვევა, მშენებლობის სრული დასრულებისთვის დამატებით კიდევ 6 მლნ ლარი გახდება საჭირო, რომელიც შესაძლოა მოიჯარე ინვესტორის ვალდებულებად განისაზღვროს, ან აჭარის მთავრობამ გამოყოს.