საქართველოს მოქალაქეებს თურქეთში სატრანზიტო საფასურის გარდა, საგარანტიო გადასახადის გადახდაც მოუწევთ, რომელიც ქვეყნის ტერიტორიის დატოვების შემდეგ უკან დაუბრუნდებათ.
ამის შესახებ საქართველოს საგარეო საქმეთა სამინისტროს საკონსულო დეპარტამენტის დირექტორმა გიორგი ტაბატაძემ დღეს გამართულ ბრიფინგზე განაცხადა.
ტაბატაძის განმარტებით, 1-ლი მაისიდან, საქართველოს მოქალაქეებს თურქეთში დატვირთული ავტოსატრანსპორტო საშუალებისთვის სატრანზიტო გავლის საფასურს 1 200 ევროს და ცარიელი ავტომანქანებზე დაწესებულ 600 ევროს საგარანტიო გადასახადიც დაემატება, რომელიც დატვირთული ტრანსპორტის შემთხვევაში ტვირთის და გადამზიდს, ხოლო ცარიელი ავტომანქანის შემთხვევაში მხოლოდ მისი თვითღირებულებიდან განისაზღვრება.
"თურქული მხარე შეშფოთებულია, რადგანაც სატრანზიტო გადაზიდვების დროს არადეკლარირებული საქონლის გაყიდვა ხდება. ამის აღსაკვეთად კი მათ დამატებითი საგარანტიო გადასახადი დააწესეს, რომლსაც საბაჟო კომისია ტვირთის თვითღირებულების მიხედვით განსაზღვრავს. მას შემდეგ კი რაც გადამზიდი ქვეყნის საზღვრებს დატოვებს მას გადახდილი თანხა უკან დაუბრუნდება", - აღნიშნა ტაბატაძემ.