დღეს, 20 მარტს, იწურება კომუნიკაციების მარეგულირებელი ეროვნული კომისიის მიერ ტელეკომპანია "იმედი"-სთვის მიცემული ვადა, რომლის მიხედვითაც იმიტირებული "ქრონიკის" გამო სპეციალური დეკლარაცია უნდა გამოაქვეყნოს.
დეკლარაციაში იმედმა უნდა აღიაროს კანონმდებლობის დარღვევის ფაქტი და ინციდენტის გამო საზოგადოებას ბოდიში უნდა მოუხადოს.
აღნიშნული გადაწყვეტილება კომუნიკაციების მარეგულირებელმა ეროვნულმა კომისიამ 15 მარტის საგანგებო სხდომაზე მიიღო.
კომისიის სამართლებრივი რეგულირების უფროსის კახი ყურაშვილის განმარტებით, მიღებული გადაწყვეტილება თანაზომადი და პროპორციულია.
შეგახსენებთ, რომ ტელეკომპანია "იმედმა" იმიტირებული "ქრონიკის" გამო მოსახლეობას ბოდიში კომუნიკაციების მარეგულირებელი ეროვნული კომისიის მხრიდან დავალდებულებამდე მოუხადა. როგორც ტელეკომპანიის ხელმძღვანელები განმარტავდნენ, იმიტირებული გადაცემის მომზადების მიზანი რუსეთის აგრესიული გეგმისთვის ხელის შეშლა იყო და არა მოსახლეობაში პანიკის დათესვის მცდელობა.
აღნიშნულის მიუხედავად, კანონდებლობის მიხედვით "იმედი" ვალდებულია შეასრულოს კომუნიკაციების მარეგულირებელი ეროვნული კომისიის გადაწყვეტილება.