რუსეთის პრეზიდენტი დიმიტრი მედვედევი აშშ-ის სახელმწიფო მდივანს ჰილარი კლინტონს შეხვდა. საუბრის ძირითადი თემა სტრატეგიული თავდაცვითი ხასიათის შეიარაღების შემცირების შესახებ ახალი ხელშეკრულების მომზადების საკითხები იყო.
მედვედევმა და კლინტონმა შეხვედრისას ასევე განიხილეს აქტუალური საერთაშორისო საკითხები. ამგვარ საკითხთა შორის იყო ირანის ბირთვული პროგრამის ირგვლივ შექმნილი სიტუაცია, "ექვსეულის" მუშაობის ფორმატის ფარგლებში. აქცენტი გაკეთდა პალესტინასა და ისრაელს შორის მოლაპარაკებების განახლებისკენ მიმართულ ძალისხმევაზე. საუბარი ავღანეთის ირგვლივ არსებული სიტუაციის დარეგულირებასაც შეეხო.
კრემლის პრესსამსახურის მიერ გავრცელებული ოფიციალური ინფორმაციით, შეხვედრისას რუსეთსა და აშშ-ს შორის მიღწეულ იქნა შეთანხმება ორ ქვეყანას შორის თანამშრომლობის შესახებ, რუსეთის ეკონომიკის მოდერნიზაციისა და მის განვითარების ინოვაციურ გზაზე გადასვლის შესახებ.
შეგახსენებთ, რომ მოსკოვში მყოფი აშშ-ის სახელმწიფო მდივანი ჰილარი კლინტონი რუსეთის საგარეო საქმეთა მინისტრ სერგეი ლავროვს უკვე შეხვდა.
