თბილისის მერიის მიერ წარმოდგენილი ქალაქის 2014 წლის ბიუჯეტის პროექტს სხდომამდე საკანონმდებლო ორგანოს ყველა კომისია განიხილავს. ამის შესახებ, საკრებულოს თავმჯდომარემ ირაკლი შიხიაშვილმა და და უმრავლესობის წარმომადგენლებმა ჟურნალისტებთან საუბრისას განაცხადეს.
შიხიაშვილის განმარტებით, საკრებულო მოტივირებულია ქალაქს ჰქონდეს თბილისელებისათვის სასარგებლო ბიუჯეტი და ის არ იყოს მორგებული კონკრეტული პოლიტიკური ორგანიზაციის საარჩევნო კამპანიაზე.
,,დეკემბერში საკრებულომ განიხილა 730 მილიონიანი და არა 785 მილიონიანი ბიუჯეტის პროექტი, რომელიც ჩაუშლელად, მხოლოდ და მხოლოდ ერთ ფურცელზე იყო განთავსებული.
ჩვენ გვაინტერესებს და მოვითხოვთ იანვრის თვის 1/12 ხარჯს. აუცილებელია ვიცოდეთ, როგორ გახარჯა ფული მერიამ პრიორიტეტების მიხედვით. იქმნებოდა ფონი თითქოს საკრებულო პრობლემას უქმნიდა მერიას. დაბრალება იოლია, მაგრამ, მოდით ვისაუბროთ დასაბუთებულად.საკრებულო მოტივირებულია ქალაქს ჰქონდეს თბილისელებისათვის სასარგებლო ბიუჯეტი და ის არ იყოს მორგებული კონკრეტული პოლიტიკური ორგანიზაციის საარჩევნო კამპანიაზე.
საკრებულოს რეაქცია არის ადეკვატური და არავის ჯიბრით არ ვწელავთ ამ თემას. დღეს ბიუჯეტი ჩვენი პასუხისმგებლობის ქვეშ უნდა იყოს მიღებული და მისი დეტალურად შესწავლის შემდეგ გვეცოდინება, თუ რას ვუჭერთ მხარს",- განაცხადა ირაკლი შიხიაშვილმა.
მისივე თქმით, მერიის მიერ განახლებული ბიუჯეტი თავდაპირველად კომისიებს დაურიგდებათ და დოკუმენტის დამტკიცებამდე დეტალურად მოხდება მისი განხილვა.
შეგასხსენებთ, რომ თბილისის მერიამ საკრებულოში დედაქალაქის ბიუჯეტის პროექტი დღეს შეიტანა.