გაეროს მსოფლიო მეტეოროლოგიური ორგანიზაციის WMO განცხადებით, ავსტრალიის ხანძრების შედეგად წარმოშობილმა კვამლმა გადალახა წყნარი ოკეანე სამხრეთ ამერიკის კონტინენტამდე მიაღწია.
ორგანიზაციის ცნობით, ჩილეს ცენტრალურ ნაწილში ცა ნაცრისფერი გახდა. ადგილობრივი მეტეოროლოგიური სააგენტოების ინფორმაციით კი, არგენტინის დედაქალაქ ბუენოს აირესში მზის ჩასვლისას ცამ წითელი ფერი მიიღო.
მსოფლიო მეტეოროლოგიური ორგანიზაციის პრესსპიკერმა ჟენევაში ჟურნალისტებს უთხრა, რომ კვამლმა შესაძლოა ანტარქტიკამდეც მიაღწიოს.
იტყობინებიან, რომ კვამლი ჯანმრთელობისთვის საფრთხეს არ წარმოადგენს სამხრეთ ამერიკაში, რომელიც ავსტრალიიდან 11000 კილომეტრში მდებარეობს.
ხანძარი ავსტრალიის ტერიტორიაზე სექტემბრიდან მძვინვარებს. ევროკავშირის კოპერნიკის მონიტორინგის პროგრამის ინფორმაციით, ხანძრის შედეგად ატმოსფეროში 400 მეგატონა ნახშირორჟანგი გამოიყო.
ხანძარს ემსხვერპლა 25 ადამიანი. დაიწვა მილიონობით ჰექტარი ტყის მასივი. განადგურდა ასეულობით საცხოვრებელი სახლი და ადმინისტრაციული შენობა.
სიდნეის უნივერსიტეტის კვლევის მიხედვით, ავსტრალიაში ტყის ხანძრებს ნახევარ მილიარდამდე ცხოველი ემსხვერპლა.