ნატოს საპარლამენტო ასამბლეის პრეზიდენტი მედლინ მუნი საოკუპაციო ხაზთან, სოფელ ხურვალეთში ჩავიდა. მედლინ მუნის თქმით, ის ყველაფერს გააკეთებს, რომ საზოგადოებას უფრო ვრცელი ინფორმაცია მიაწოდოს იმ სირთულეებისა და იმ სისასტიკის შესახებ, რაც საოკუპაციო ხაზთან ხდება. მედლინ მუნის კომენტარს "პირველი არხი" ავრცელებს.
"საპარლამენტო ასამბლეა მოვიდა აქ, საოკუპაციო ხაზთან, რომ ნახოს რა პრობლემები აქვთ იმ ხალხს, რომლებიც ერთ დროს საქართველოს მოქალაქეები იყვნენ და მეორე დღეს გაიღვიძეს და ეს მოქალაქეობა წართმეული ჰქონდათ.
მნიშვნელოვანია, რომ ჩვენ თავად მოვისმინეთ ამ ადამიანის საუბარი და მადლობას ვუხდით სიმამაცისთვის, რომ მოვიდა და აგვიხსნა ყველაფერი, ის სირთულეები, რის წინაშეც დგას, რა ულმობელი და არაადამიანური პირობებია აქ, სადაც ადამიანებს საკუთარი მიწები ჩამოართვეს. ჩვენი საქმეა, რომ დავაკვირდეთ აქ მიმდინარე პროცესებს, დავსვათ კითხვები და გავიტანოთ ამ ადამიანის საუბარი ჩვენს შემდგომ შეხვედრაზე ლონდონში. ჩვენ ამას გავაკეთებთ. მე გპირდებით, ჩვენ არ დავწერთ მხოლოდ ანგარიშს და ეს იქ არ დამთავრდება, არამედ გავაკეთებთ ყველაფერს, რაც შეგვიძლია, რომ აქ მიმდინარე პროცესები უფრო ფართო საზოგადოებისთვის გახდეს გასაგები. ეს პრობლემა, სირთულეები და სისასტიკე, ეს ყველაფერი არ არის მთავრობებს შორის, არამედ ის ადამიანები აწყდებიან, რომლებიც პატიოსნად, მშვიდად ცხოვრობენ“, - განაცხადა საქართველოში ვიზიტით მყოფმა ნატო-ს საპარლამენტო ასამბლეის პრეზიდენტმა.
ნატოს საპარლამენტო ასამხლეის პრეზიდენტი ესაუბრა ასევე საოკუპაციო ხაზის მიღმა დარჩენილ 88 წლის დათა ვანიშვილს, რომლის სახლი ოკუპირებულ ტერიტორიაზეა მოქცეული, ხოლო მიწის ნაკვეთი სოფლის იმ ნაწილშია, რომელსაც საქართველოს ცენტრალური ხელისუფლება აკონტროლებს.
მედლინ მუნმა დათა ვანიშვილს სიმამაცისთვის მადლობა გადაუხადა.