საქართველოს პრეზიდენტი სალომე ზურაბიშვილი ლიეტუვის ახლადარჩეულ პრეზიდენტს გიტანას ნაუსედას საპრეზიდენტო არჩევნებში გამარჯვებას ულოცავს.
სალომე ზურაბიშვილმა ლიეტუვის ახლადარჩეულ პრეზიდენტს მიკრობლოგ ტვიტერით მიულოცა და ხაზი გაუსვა ორი ქვეყნის მტკიცე კავშირებს.
ვულოცავ გიტანას ნაუსედას ლიეტუვის საპრეზიდენტო არჩევნებში გამარჯვებას. საქართველო და ლიეტუვა მტკიცე პარტნიორები არიან და მე ველი მასთან მუშაობას, რომ კიდევ უფრო გაღრმავდეს ორ ქვეყანას შორის ეს მტკიცე კავშირები, - დაწერა მიკრობლოგ ტვიტერში საქართველოს პრეზიდენტმა.
ლიეტუვის საპრეზიდენტო არჩევნების მეორე ტური, 55 წლის ეკონომისტი გიტანას ნაუსედასა და ქვეყნის ეროვნული ბანკის სამეთვალყურეო საბჭოს თავმჯდომარის ყოფილ მოადგილესა და ყოფილ ფინანსთა მინისტრს, ინგრიდა შიმონიტეს შორის გაიმართა.
გიტანას ნაუსედამ ამომრჩეველთა ხმების 74 %-ის მოპოვება შეძლო.
გიტანას ნაუსედა, ინაუგურაციის შემდეგ, ბალტიისპირეთის ქვეყნების "რკინის ლედის" და ევროკავშირში კრემლის პოლიტიკის მიმართ ყველაზე კრიტიკულ ლიდერს, დალია გრიბაუსკაიტეს ჩაანაცვლებს.
ლიეტუვის ამჟამინდელი პრეზიდენტი დალია გრიბაუსიკატე ქვეყანას 2009 წლიდან მართავს. მან ორი ვადით უკვე იყარა კენჭი, ლიეტუვის კანონმდებლობა მესამე ვადას პრეზიდენტისთვის არ ითვალისწინებს.
საპრეზიდენტო არჩევნების პირველი ტური ლიეტუვაში, 12 მაისს გაიმართა.
