„მოსკოვმა და ივანიშვილის რეჟიმმა დაიწყეს ახალი შეტევა ჩვენი ქვეყნის დამოუკიდებლობის და თავისუფლების წინააღმდეგ, - განაცხადა „ლეიბორისტული პარტიის“ ლიდერმა, შალვა ნათელაშვილმა.
მისი აზრით, ივნისში დაგეგმილი „თბილისი პრაიდის“ და მის წინააღმდეგ გამართული კონტრაქციის მიზანი ქვეყანაში დესტაბილიზაციის შექმნაა, რაც კრემლის ინტერესებშია.
„როგორც კი სექსუალურ საკითხებს შეეხება პრობლემატიკა, მაშინ უკვე იწყება ქუჩის აქტიურობა. პირველი ეტაპი, „ცოცხების ოპერაცია“, რუსეთმა წარმატებით დადგა და ხელისუფლების შეცვლას მიაღწია, ახლა იწყება ოპერაცია „ცოცხი ორი“. რა შთაბეჭდილება უნდა დარჩეს მსოფლიოს, რომ მხოლოდ სექსუალურ თემატიკაზე გამოვდივართ ქუჩაში?“, – აცხადებს ნათელაშვილი.
მისივე განცხადებით, ლგბტ თემის წარმომადგენლების მიერ დაგეგმილი აქცია ზუსტად ჯდება მოსკოვის გეგმებში და ნათელაშვილის თქმით, არ არის გამორიცხული, ისინიც ფინანსდებოდნენ რუსეთის მიერ, ისევე როგორც კონტრაქციის ორგანიზატორები.