"დავით ოქიტაშვილმა უდიდესი ზიანი მიაყენა საარჩევნო პროცესს", - ამის შესახებ საქართველოს მეტალურგთა, მეშახტეთა და ქიმიკოსთა პროფკავშირის ხელმძღვანელი თამაზ დოლაბერიძე სოციალურ ქსელს Facebook-ზე წერს.
როგორც დოლაბერიძე აღნიშნავს, ერჩივნა კანდიდატები დაძაბულ კონკურენტულ გარემოში დარჩენილიყვნენ.
"დავით ოქიტაშვილმა მთელი 15 დღის განმავლობაში იჭორავა, ილანღა, ღვარძლი ანთხია, შეურაცხყოფა მიაყენა ყველას და ყველაფერს, მოაბინძურა მთელი საინფორმაციო ველი... და საარჩევნო პროცედურის დაწყებამდე ერთი საათით ადრე მოხსნა საკუთარი კანდიდატურა...
ჩემი აზრით მან უდიდესი ზიანი მიაყენა საარჩევნო პროცესს. მე როგორც დელეგატს მერჩივნა, რომ მას ეს არ გაეკეთებინა და კანდიდატები დაძაბულ კონკურენტულ გარემოში დარჩენილიყვნენ...
ეს ის შემთხვევაა, როდესაც გამარჯვებაც და დამარცხებაც ბრძოლაში სჯობს", - წერს დოლაბერიძე.
შეგახსენებთ, გაერთიანებული პროფკავშირების თავმჯდომარის კანდიდატებისთვის ხმის მიცემის პროცესი ამ წუთებში მიმდინარეობს.
არჩევნებში ირაკლი პეტრიაშვილი და ამირან ზენაიშვილი იღებენ მონაწილეობას. მესამე კანდიდატმა - დავით ოქიტაშვილმა კანდიდატურა არჩევნების დაწყების წინ მოხსნა.
ფარული კენჭისყრა ორ საათს გაგრძელდება.
