საქართველოს პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე საქართველოში თურქეთის საგანგებო და სრულუფლებიან ელჩს, ზექი ლევენთ გუმრუქჩუს შეხვდა.
შეხვედრაზე აღინიშნა, რომ თურქეთი საქართველოს მთავარი სავაჭრო პარტნიორია. მხარეებმა ხაზი გაუსვეს საქართველოს და თურქეთის სტრატეგიული პარტნიორობის მნიშვნელობას და ეკონომიკური თანამშრომლობის შემდგომი გაფართოვების პერსპექტივებს.
ირაკლი კოვზანაძემ და ზექი ლევენთ გუმრუქჩუმ ორი ქვეყნის ეკონომიკური და ბიზნეს ურთიერთობების არსებული მდგომარეობა და შესაძლებლობები, საქართველო-თურქეთს შორის მოქმედი თავისუფალი სავაჭრო ხელშეკრულება, მხარეთა ვალდებულებები და სხვა აქტუალური საკითხები მიმოიხილეს.
საფინანსო-საბიუჯეტო კომიტეტის თავმჯდომარემ თურქეთის რესპუბლიკის ელჩს გააცნო ის კანონპროექტები, რომელზე პარლამენტი ამჟამად მუშაობს.
კერძოდ, საუბარი შეეხო „თურქეთის რესპუბლიკასა და საქართველოს შორის თავისუფალი ვაჭრობის შესახებ შეთანხმებაში" შესატან ცვლილებებს, რომლის თანახმად ქართულ კომპანიებს ექნება შესაძლებლობა ევროკავშირთან თავისუფალი სავაჭრო სივრცის შეღავათით ისარგებლოს იმ შემთხვევაშიც, როცა საქონლის წარმოებაში თურქულ ნედლეულს გამოიყენებს.
საფინანსო-საბიუჯეტო კომიტეტის თავმჯდომარემ სტუმართან ასევე ისაუბრა საქართველოს ხელისუფლების საფინანსო-ეკონომიკურ პოლიტიკასა და მის ძირითად მიზნებზე; ქვეყნის პრიორიტეტულ მიმართულებებსა და საქართველოში მიმდინარე იმ ინფრასტრუქტურულ პროექტებზე, სადაც თურქული ინვესტიციებია ჩადებული და თურქული კომპანიები მონაწილეობენ.