სახალხო დამცველი უჩა ნანუაშვილის განცხადებით, 2012 წლის მღელვარე მოვლენების შემდეგ 2013 წელი ნაკლები დრამატულობით გამოირჩეოდა. როგორც ნანუაშვილმა საქართველოში ადამიანის უფლებებისა და თავისუფლებების კუთხით არსებული მდგომარეობის ანგარიშის წარდგინებისას განაცხადა პროგრესის მიუხედავად პრობლემები ჯერ კიდევ რჩება.
"დადებით ტენდენციებს შორის ერთ-ერთი პირველია ის არის, რომ წელს პირველად პარლამენტმა გაიზიარა სახალხო დამცველის ანგარიშში არსებული რეკომედაციები და შესაბამის სახელმწიფო უწყებებს კონკრეტული ღონისძიებების გატარება დაავალა, ანუ პრაქტიკა, როცა პარლამენტი სახალხო დამცველის ანგარიშს ცნობად იღებდა, წარსულს ჩაბარდა. ასევე დადებით ტენდენციად შეიძლება აღინიშნოს სისხლის სამართლის პოლიტიკის ლიბერალიზაციაც, რაც მიმდინარე წლის განმავლობაში ადამიანის უფლებების დაცვის სფეროში ერთ-ერთ მნიშვნელოვან მიღწევად შეიძლება შეფასდეს. ასევე სასჯელაღსრულების სისტემაში განხორციელებული რეფორმები: ხელისუფლების მიერ განხორციელებული ფართომასშტაბიანი ამნისტიისა და სისხლის სამართლის პოლიტიკის ლიბერალიზაციის შედეგად შემცირდა სასჯელაღსრულების სისტემაში მოთავსებულ პირთა რაოდენობა, რითაც აღმოიფხვრა ციხეებში გადატვირთულობის პრობლემა და გაუმჯობესდა პატიმართა მდგომარეობა. 2013 წლის განმავლობაში პენიტენციარულ სისტემაში არ დაფიქსირებულა წამების, არაადამიანური მოპყრობისა და ღირსების შემლახავი ფაქტები. ამავე დროს მნიშვნელოვნად შემცირდა სისტემაში პატიმართა გარდაცვალების მაჩვენებელი", - განაცხადა უჩა ნანუაშვილმა.
ნანუაშვილის განმარტებით, პოზიტიურად შესაფასებელია შრომის კოდექსში განხორციელებული ცვლილებებიც.