საქართველოს პრემიერ-მინისტრის ირაკლი ღარიბაშვილის განმარტებით, ყოფილი პრემიერ-მინისტრის ზურაბ ჟვანიას როლი დამოუკიდებელი საქართველოს პოლიტიკურ ცხოვრებაში ძალიან დიდია. როგორც ღარიბაშვილმა ,,თბილისში მარიოტში" მიმდინარე კონფერენციაზე განაცხადა ნიშანდობლივია, რომ ზურაბ ჟვანიას 50 წლისთავისადმი მიძღვნილი კონფერენცია სწორედ საქართველოს ევროკავშირთან ურთიერთობის თემაზე იმართება.
,,ზურაბ ჟვანიას როლი და დამსახურება დამოუკიდებელი საქართველოს პოლიტიკურ ცხოვრებაში ძალიან დიდია. მან მნიშვნელოვანი კვალი დაატყო ქართულ პოლიტიკას, ქართული სახელმწიფოს დემოკრატიულ აღმშენებლობას. ზურაბ ჟვანია იმ პარლამენტს ჩაუდგა სათავეში, რომელიც მუშაობას შეუდგა დამოუკიდებელი საქართველოს ახალი კონსტიტუციის ამოქმედების შემდეგ. მისი თავმჯდომარეობით პარლამენტი დამოუკიდებელ და ძლიერ ინსტიტუტად იქცა და ამით ჩვენი ქვეყანა განვითარებული, თანამედროვე სახელმწიფოების რიგში ჩადგა", _განაცხადა ღარიბაშვილმა.
მისივე განმარტებით, როცა საქართველოს ევროკავშირში ინტეგრაციაში ვსაუბრობთ. წარმოუდგენელია, არ გავიხსენოთ ზურაბ ჟვანიას ცნობილი სიტყვები.
,,დღეს, როცა საქართველოს ევროპასთან დაახლოებასა და ჩვენი ქვეყნის ევროპულ პერსპექტივებზე ვლაპარაკობთ, იმ ღირებულებებზე ვლაპარაკობთ, რომლებიც ასე ახლობელი იყო ზურაბ ჟვანიასთვის, არ შეიძლება არ გავიხსენოთ მთელი მსოფლიოს გასაგონად სტრასბურგიდან ნათქვამი მისი ცნობილი სიტყვები. ეს იყო უაღრესად ამაღელვებელი სიტყვები ყველა ქართველისთვის და ამავე დროს გასათვალისწინებელი მთელი დასავლეთისთვის. ეს იყო პირველი ნაბიჯი ევროპისკენ, იმ ევროპისკენ, რომლის ბუნებრივ ნაწილად გრძნობდნენ თავს ჩვენი დიდი წინაპრები, რომლისკენაც მიისწრაფოდნენ ისინი, რომელზეც ოცნებობდნენ და რის რეალურად განხორციელების ბედნიერებაც მხოლოდ ჩვენს თაობას ხვდა წილად", _განაცხადა ღარიბაშვილმა.