რეგიონული განვითარებისა და ინფრასტრუქტურის მინისტრის დავით ნარმანიას განცხადებით, ბოლო სამი დღის განმავლობაში თვითმმართველობის კოდექსში რამდენიმე ნორმა დასუსტდა და შეიცვალა. თუმცა ნარმანიას მთავრობის სხდომის დასრულების შემდეგ ჟურნალისტებთან არ დაუკონკრეტებია რა შეიცვალა თვითმმართველობის კოდექსში.
მისივე განმარტებით, ამ საკითხზე საუბარი პარლამენტში იქნება, როცა თვითმმართველობის კოდექსის განხილვა დაიწყება.
,,ბოლო სამი დღის განმავლობაში საქართველოს მთავრობასა და უმრავლესობის წევრებში ინტენსიური კონსულტაციები მიმდინარეობადა თვითმმართველობის კოდექსთან დაკავშირებით. აქედან გამომდინარე რამდენიმე ნორმა გადახედილი და შეცვლილი იქნა. საქართველოს პარლამენტის სხდომაზე როდესაც გაგრძელდება განხილვები, ასეთ შემთხვევაში წარმოდგენილი იქნება უფრო მოდიფიცირებული და დახვეწილი ვარიანტი. თუმცა კიდევ ერთხელ ხაზს ვუსვამ, ფაქტებზე რომელზეც თვითმმართველობის კოდექსთან დაკავშირებით საუბარი იყო არაარსებითია. უსაფრთხოების საკითხებთან დაკავშირებული თემები რაზეც ასევე ბოლო პერიოდის განმავლობაში ხშირად ხდება თავდასხმა, შესაბამის სამსახურებთან გავლილი იქნა და შსს რეკომენდაციები ასევე გათვალისწინებული იქნა", _განაცხადა ნარმანიამ.
ნარმანიას განმარტებით, პატრიარქის გუშინდელი განცხადების შემდეგ უწმინდესთან შეხვედრა არ ჰქონია. თუმცა ნარმანიას განმარტებით საპატრიაქოსთან კომუნიკაცია რამდენიმე თვის წინ ჰქონდა, სადაც მზაობა გამოთქვა, რომ თვითმმართველობის კოდექსის განხილვა მომხდარიყო იმ ადამიანების წრეში ვისაც გარკვეული კითხვები ჰქონდათ.
შეგახსენებთ, რომ უწმინდესი და უნეტარესი ილია მეორე თვითმმართველობის რეფორმას გუშინ გამოეხმაურა. როგორც სვეტიცხოვლის ტაძარში საზეიმო წირვის დასრულების შემდეგ უწმინდესმა ქადაგებისას ბრძანა თუ ხელისუფლება თვითმმართველობის ახალ კანონს მიიღებს ამით საქართველოს დაშლისკენ უბიძგებს.
