ტურნირის გენერალური სპონსორია სამორინე „შანგრი ლა"
2013 წლის 3 დეკემბერს ქ. თბილისში ჩატარდა ინტეგრირებული ტურნირი შაშში, რომელიც მიეძღვნა შეზღუდული შესაძლებლობების მქონე ადამიანთა საერთაშორისო დღეს. ტურნირის განმავლობაში შეზღუდული შესაძლებლობების მქონე ადამიანებს საშუალება მიეცათ ეთამაშათ შაში არა მხოლოდ ერთმანეთთან, არამედ ასევე ცნობილ ქართველ არტისტებსა და შემოქმედ პირებთან.
ტურნირში მონაწილეობდა ოცდაათზე მეტი პოპულარული მუსიკოსი, არტისტი, ტელეწამყვანი და სხვა ცნობილი პირი, რომლებმაც ნამდვილი დღესასწაული აჩუქეს მრავალ ადამიანს, ვისაც იშვიათად ეძლევა შესაძლებლობა ჩაერთონ კულტურულ ღონისძიებებში. ტურნირის სტუმრებს შორის იყვნენ ვასიკო ოდიშვილი, დავით არჩვაძე, ზურა ნიჟარაძე, ჯგუფი „ქუჩის ბიჭები", დათო როსტომაშვილი, ხვიჩა მაღლაკელიძე, გიორგი გაგლოევი.
ტურნირის წესებით გათვალისწინებული იყო ფულადი პრიზები შეზღუდული შესაძლებლობების მქონე ადამიანებიდან პირველი სამი გამარჯვებულისათვის. ტურნირის ერთ-ერთი აღსანიშნავი მომენტი იყო ნახევარფინალში უსინათლო მოთამაშეების მოხვედრა, რომლებიც ღირსეულად იმარჯვებდნენ სრულფასოვანი მხედველობის მქონე ადამიანებთან თამაშში.
ღონისძიებაზე სუფევდა სპორტული ატმოსფერო, რის წყალობითაც შეზღუდული შესაძლებლობის მქონე ადამიანებს საშუალება მიეცათ დროებით დაევიწყათ თავისი სნეულებანი და წარმოეჩინათ საკუთარი ნიჭი თამაშში. ტურნირი ორგანიზებულ იქნა ქალ-ფილანტროპების ასოციაციის მიერ საქართველოს სპორტისა და ახალგაზრდობის საქმეთა სამინისტროსა და ქალაქ თბილისის მერიის მხარდაჭერით, ტურნირის გენერალური სპონსორი იყო სამორინე „შანგრი ლა".
მასალის გამოყენების პირობები