საქართველოს პრეზიდენტი, გიორგი მარგველაშვილი ევროკავშირის სპეციალურ წარმომადგენელს სამართლებრივ რეფორმებსა და ადამიანის უფლებების საკითხებში თომას ჰამერბერგს შეხვდა.
იორგი მარგველაშვილმა კიდევ ერთხელ დაადასტურა ხელისუფლების პოლიტიკური ნება მართლმსაჯულების სფეროში დაწყებული რეფორმების გაგრძელების შესახებ.
პრეზიდენტმა თომას ჰამერბერგთან შეხვედრაზე აღნიშნა, რომ 2014 წელი საქართველოსთვის რთული იქნება, ვინაიდან ქვეყანა სერიოზული გამოწვევების წინაშე დგას და ასოცირების ხელშეკრულების პარაფირებიდან ხელმოწერამდე ევროკავშირის მხარდაჭერა მნიშვნელოვანია.
თომას ჰამერბერგი საქართველოში მისიას 2013 წლის დეკემბერში დაასრულებს. გიორგი მარგველაშვილმა მას საქართველოს მთავრობასთან თანამშრომლობის გაგრძელება 2014 წლის განმავლობაშიც სთხოვა.
როგორც ევროკავშირის სპეციალურმა წარმომადგენელმა განაცხადა, გიორგი მარგველაშვილთან კონსტრუქციული შეხვედრა ჰქონდა და განიხილეს 2013 წლის სექტემბერში ევროკავშირის მიერ ადამიანის უფლებათა დაცვის მიმართულებით საქართველოს მთავრობისთვის მიცემული რეკომენდაციები, რაც საქართველოს ეროვნული სტრატეგია და სამოქმედო გეგმის ნაწილი გახდება.
"პრეზიდენტი ძალიან დადებითად არის განწყობილი ამ საკითხებისადმი. ადამიანის უფლებების დაცვა იქნება ერთ-ერთი წამყვანი გამოწვევა ქვეყნისთვის. ასევე ვისაუბრეთ საქართველო-ევროკავშირის ურთიერთობებზე და იმ წარმატებებზე, რაც თქვენს ქვეყანას ჰქონდა ვილნიუსში. საქართველოს დაახლოება ევროპულ საზოგადოებასთან ხელს შეუწყობს საქართველო-ევროპას შორის მიმოსვლას, ეკონომიკასა და ვაჭრობას, რაც ჩვეულებრივ მოქალაქეებზეც აისახება," - განაცხადა თომას ჰამერბერგმა.