,,ნაციონალური მოძრაობა" საქართველოს წინააღმდეგ ევროსაბჭოს საპარლამენტო ასამბლეის სანქციას ეხმიანება. როგორც პარტიის ოფისში გამართულ პრესკონფერენციაზე ,,ნაციონალური მოძრაობის" წევრმა ჩიორა თაქთაქიშვილმა განმარტა აღნიშნული სანქცია უნდა განვიხილოთ, როგორც ქართული დიპლომატიის მარცხი რუსეთის წინაშე და „ქართული ოცნების" მცდარი საგარეო კურსის ლოგიკური შედეგი.
,,აღმაშფოთებელია ნებისმიერი სანქციის დაკისრება საქართველოსთვის ევროსაბჭოს მიერ რუსეთ-საქართველოს ომთან დაკავშირებული საკითხის გამო მაშინ, როდესაც ამ ორგანიზაციას არავითარი სანქცია არ გამოუყენებია რუსეთის წინააღმდეგ, რომელიც თითქმის 5 წელია, არ ასრულებს რეზოლუციებით დაკისრებულ არც ერთ ვალდებულებას საქართველოსთან და საქართველოს მოქალაქეებთან მიმართებით. არ გვსურს ვიფიქროთ, რომ „ქართული ოცნება" შეეცდება ეს სანქცია გამოიყენოს "ოკუპირებული ტერიტორიების შესახებ" კანონის შესუსტების საბაბად. თუმცა, უმრავლესობის მიერ გაკეთებული განცხადებები ამის საფუძველს გვაძლევს. პაატა ზაქარეიშვილი რა ხანია იმუქრება, რომ ეს ცვლილება აუცილებლად განხორციელდება.იმ შემთხვევაში, თუ გამართლდება ჩვენი ვარაუდი და მთავრობა გადაწყვეტს კანონში ცვლილებების შეტანას, „ერთიანი ნაციონალური მოძრაობა" მიმართავს ყველა ზომას, რათა წინ აღუდგეს ასეთ მცდელობას, მათ შორის, ჩვენ მოვითხოვთ საპარლამენტო პოლიტიკური დებატების დანიშვნას. „ოკუპირებული ტერიტორიების შესახებ" კანონის შესუსტება მაშინ, როდესაც რუსეთმა განაახლა უკანონო კედლების აღმართვა საქართველოს შუაგულში, როდესაც ადამიანებს საკუთარი ხელით აშლევინებენ სახლებს დაყრიან თავიანთი წინაპრების მიწებიდან, აწყობს მხოლოდ რუსეთს და პირდაპირ ეწინააღმედება საქართველოს ეროვნულ ინტერესებს", _განაცხადა თაქთაქიშვილმა.