ხვალ, 2 დეკემბერს, თბილისში დემოკრატიისა და ეკონომიკური განვითარების ორგანიზაცია სუამის საპარლამენტო ასამბლეის რიგით მე-6 სხდომა გაიხსნება. სხდომას სუამ-ის საპარლამენტო ასამბლეის თავმჯდომარის რანგში ზურაბ აბაშიძე გახსნის.
დაგეგმილია პარლამენტის თავმჯდომარე დავით უსუფაშვილის, საგარეო საქმეთა მინისტრ მაია ფანჯიკიძის, აზერბაიჯანის მილი მეჯლისის ვიცე-სპიკერ ზიაფატ ასგაროვის, მოლდოვას პარლამენტის ვიცე-სპიკერ ოლეგ ბოდრუგის, უკრაინის რადას ვიცე-სპიკერ რუსლან კოშულინსკის, ბალტიის ასამბლეის პრეზიდენტ რაიმონდს ვეიონისის, პოლონეთის პარლამენტის სეიმის მარშლის მოადგილე ცეზარ გრაბარჩიკის და სუამ-ის გენერალური მდივნის, ვალერი ჩეჩელაშვილის გამოსვლები.
სხდომის მონაწილეები განიხილავენ ისეთ საკითხებს, როგორიცაა საპარლამენტთაშორისო თანამშრომლობის როლი საერთაშორისო და რეგიონული უსაფრთხოების მხარდაჭერის სფეროში; სუამ-ის საზღვრებში არსებული კონფლიქტები და მათი ზეგალენა რეგიონულ და საერთაშორისო მშვიდობაზე, სტაბილურობასა და განვითარებაზე. ასევე მსჯელობის საგანი იქნება პოლიტიკური ურთიერთობები და ევროპული და ევროატლანტიკური ინტეგრაცია - გამოცდილების გაზიარება ევროპული და ევროატლანტიკური ინტეგრაციის საკითხებში, აღმოსავლეთ პარტნიორობა - ვილნიუსიდან რიგამდე; სუამ-ევროკავშირის თანამშრომლობის პერსპექტივები. გარდა ამისა, მხარეები სუამ-ის ეკონომიკურ პოტენციალთან დაკავშირებულ საკითხებსაც განიხილავენ.
სუამის საპარლამენტო ასამბლეის რიგით მე-6 სხდომა 2-3 დეკემერს, სასტუმრო "ქორთიარდ მერიოტში" ჩატარდება.
