"ახალი მემარჯვენეების"ვილნიუსის სამიტთან დაკავშირებით განცხადებას ავრცელებენ, რომელსაც "ჯი-ეიჩ-ენი" უცვლელად გთავაზობთ:
ვილნიუსის სამიტმა დაასრულა ევროპის სამეზობლო პოლიტიკისა და აღმოსავლეთ პარტნიორობის პირველი ეტაპი. საქართველომ ევროკავშირთან ასოცირების შესახებ შეთანხმების პარაფირებით მნიშვნელოვანი ნაბიჯი გადადგა ევროინტეგრაციის გზაზე.
ევროპული არჩევანი ქართველი ხალხის მართლაც ისტორიული არჩევანია.
ევროკავშირი საქარველოსთვის არის საიმედო პოლიტიკური პარტნიორი დემოკრატიული მშენებლობის გზაზე და ამავდროულად, ყველაზე დიდი სავაჭრო პარტნიორი და ინვესტიციების წყარო, რაც სასიცოცხლოდ მნიშვნელოვანია ჩვენი ეკონომიკის მდგრადი და სტაბილური განვითარებისთვის.
საკუთრივ საქართველოს გამოცდილება და ამ ეტაპზე ჩვენს თვალწინ უკრაინაში განვითარებული დრამატული მოვლენები ცხადყოფს, რომ ვილნიუსის სამიტის შემდგომ საქართველოს საკმაოდ რთული პერიოდის გავლა მოუწევს.
საქართველოს ეკონომიკა, საბედნიეროდ, დღეს აღარ არის რუსეთზე ისე დამოკიდებული, როგორც უკრაინის, მაგრამ ქართული პროდუქციისთვის რუსეთის ბაზრის დაკეტვის პოლიტიკურ ბერკეტს, სავარაუდოდ, რუსეთი მომავალ წელს საქართველოზე ზეწოლისთვის აქტიურად აამუშავებს. უნდა ველოდოთ ახალი პრობლემების შექმნას ოკუპირებული ტერიტორიების მიმდებარე ზონებში, მოსალოდნელია სეპარატისტული მოძრაობების, ეთნიკურ თუ რელიგიურ ნიადაგზე კონფლიქტების წახალისება. მაგრამ ეს ყველაფერი საქართველოსთვის არც განვლილ პერიოდში იყო უცხო.
ხელისუფლებამ დაუყოვნებლივ უნდა შეიმუშავოს ევროინტეგრაციის განხორციელების საგზაო რუკა, სადაც ყველა მოსალოდნელი საგარეო თუ საშინაო გამოწვევის გადაჭრის გზა იქნება ჩამოყალიბებული.
ეს პერიოდი იქნება საქართველოს ხელისუფლების და ქართული საზოგადოების დიდი გამოცდა.
ქართულ საზოგადოებას მართებს დიდი სიმტკიცე საიმისოდ, რათა დემოკრატიულ სამყაროს დავუმტკიცოთ, რომ ჩვენი გზა - ქართული სახელმწიფოს გზა, ნამდვილად ევროპული გზაა და სხვა ალტერნატიული ვერსიები, შიდა გამოწვევების თუ გარედან ზეწოლის შედეგად არ განიხილება, რომ ჩვენ ვართ ჩამოყალიბებული საზოგადოება, რომელიც წარსულის ილუზორული ნოსტალგიურობით კი არ იკვებება, არამედ უპირობოდ პროგრესზეა ორიენტირებული.
საქართველოს ხელისუფლების, ქართული ოპოზიციის, მთელი ქართული საზოგადოების უდიდესი პასუხისმგებლობაა ყველაფერი გააკეთოს, რათა საქართველოს სახელმწიფოსთვის კიდევ ერთხელ მიცემული ამ ისტორიული შესაძლებლობის რეალიზება კითხვის ნიშნის ქვეშ არ დადგეს.
